QR Tuńǵysh Prezıdenti kúni qazaqstandyq estrada juldyzdarynyń qatysýymen «Án qanatyndaǵy arman» kontserti bolady

ASTANA. 27 qarasha. QazAqparat - 1 jeltoqsanda «Qazaqstan» ortalyq kontsert zalynda QR Tuńǵysh Prezıdentiniń kúnine arnalǵan «Án qanatyndaǵy arman» lırıkalyq kontserti ótedi. Bul týraly astana.kz saıtyna qalalyq Mádenıet basqarmasynan habarlady.

Qonaqtar qazaqstandyq estradanyń jetekshi juldyzdarymen júzdesedi. Kontsertte Roza Rymbaeva, Nurjamal Úsenbaeva, «Mýzart» trıosy, «Sazgen sazy» folklorlyq-etnografııalyq ansambli, Indıra Rasylhan, Oleg Tatamırov jáne t.b. óner kórsetedi.

Merekelik shara 3 bólimmen ótedi. Birinshi bólimde N.Nazarbaevtyń balalyq shaǵyndaǵy halyq ánderi men halyq kompozıtorlarynyń ánderi oryndalady. Sonyń ishinde «Beý, aıdaı», «Gúlderaıym», «Jan sáýlem», «Shıli ózen» jáne t.b. Bul ánder «Sazgen sazy» folklorlyq-etnografııalyq ansambliniń súıemeldeýimen oryndalady. Ekinshi blok Prezıdenttiń jastyq shaǵyndaǵy ánderge arnalady. Atap aıtqanda, «Nadejda», «Vody aryka», «Bessame mýcho» jáne t.b. Úshinshi blokta kórermender Prezıdenttiń, memlekettiń, elordanyń qurmetine jazylǵan ánderdi tyńdaıdy. Aıta keteıik, kontsertte bala kezden júrekte erekshe oryn tapqan qazaqstandyqtardyń súıikti ánderi oryndalady.