QR tuńǵysh Prezıdenti kúni qarsańynda Jambyl oblysynda 41 nysan ashyldy
TARAZ. QazAqparat - QR tuńǵysh Prezıdent kúnine oraı Jambyl oblysynda 41 nysan paıdalanýǵa berildi, dep habarlaıdy QazAqparat.
Elbasy Joldaýynda medıtsınalyq qyzmet sapasy halyqtyń áleýmettik kóńil-kúıiniń asa mańyzdy komponenti bolyp sanalatynyn basa aıtty desek, oblysta mereke qarsańynda ashylǵan 41 nysannyń 32-si medıtsınalyq mekemeler. Onyń 29-y memlekettik-jekeshelik áriptestik aıasynda boı kótergen. Naqtylaı toqtalsaq, 13-i aýysymyna 5 kelýshige arnalǵan medıtsınalyq pýnktter. 9-y 15 kelýshige arnalǵan dárigerlik ambýlatorııa, qalǵany aýysymyna 10 kelýshige arnalǵan 7 feldsherlik-akýsherlik pýnkt. Bulardyń deni aýdandardan ashylǵan.
Aıta ketý kerek, memlekettik-jekeshelik áriptestik aıasynda boı kótergen 29 medıtsınalyq nysanǵa barlyǵy 843 mıllıon teńge qarjy jumsalǵan. Atalǵan nysandardyń qurylysy ózge óńirlerdegi bıýdjettik ınvestıtsııalyq jobalarmen salystyrǵanda quny tómen bolyp, 1,4 mlrd teńge bıýdjet qarajaty únemdeldi.
Bul arqyly aýyldyq jerlerdegi alǵashqy medıtsınalyq kómek kórsetý qajettiligi 84 paıyzǵa qamtylady. Oblysta 95 alǵashqy medıtsınalyq kómek kórsetý uıymdaryna ǵımarat qajet bolatyn. Buny memlekettik-jekeshelik áriptestik aıasynda salý josparlanýda. Onyń 29-y bıyl ashylsa, 2019 jyly 40, 2020 jyly 25 nysan boı kóteredi dep josparlanýda. Osylaısha aldaǵy eki jylda tolyq qajettilik qamtamasyz etilmek.
QR Tuńǵysh Prezıdent kúnine oraı Jambyl oblysynda halyqtyń medıtsınalyq mekemelerge degen qoljetimdiligin arttyrýǵa arnalǵan bul nysandardan bólek, jurtshylyqtyń áleýmettik turmys sapasyn arttyrýǵa negizdelgen mekemeler de el ıgiligine berildi.
Atap aıtar bolsaq, Taraz qalasynda polıtsııa basqarmasy №1 polıtsııa bóliminiń qabyldaý bólmesi, Jambyl aýdanynda «Móldir», Jýaly aýdanynda «Ásem dostar» jekemenshik balabaqshalary, Qordaı aýdanynda 75 oryndyq «Balalyq shýaǵy», 50 oryndyq «Nur-Ádil»», 50 oryndyq «Balalyq bazary» balabaqshalary jáne 120 oryndyq «Bolashaq» shaǵyn ortalyǵy, T.Rysqulov aýdanynda 120 oryndyq «Bota» bóbekjaıy, Aýqatty aýyldyq polıtsııa bólimsheleri ashyldy.
Mereke qarsańynda paıdalanýǵa berilgen barlyq 41 nysan aldaǵy ýaqytta Elbasy Joldaýyndaǵy negizgi mindetterdiń oryndalýy jolynda el ıgiligine jumys jasaı bermek.
Sondaı-aq, mereke qarsańynda Taraz qalasynda medıtsıtsınalyq jedel járdem stansasyna 27 avtokóliktiń kilti tapsyryldy.
Ǵıbrat SEMBAI
