QR Tuńǵysh Prezıdenti kúni qarsańynda Máskeýde Elbasynyń Qazaqstan halqyna arnalǵan Joldaýyn talqylady (FOTO)

MÁSKEÝ. QazAqparat - Búgin Máskeýde «Bolashaq» Halyqaralyq baǵdarlamalar Ókildiginiń bastamasymen jáne RF-daǵy QR Elshiliginiń qoldaýymen QR Tuńǵysh Prezıdenti kúnine arnalǵan dóńgelek ústel ótti.

Sharaǵa máskeýlik JOO professorlary men oqytýshylary, reseılik ǵalymdar men sarapshylar, Eýrazııalyq ekonomıkalyq komıssııanyń ókilderi, qazaqstandyq stýdentter, sonyń ishinde «Bolashaq» baǵdarlamasynyń stıpendıattary qatysty.

Dóńgelek ústel aıasynda oǵan qatysýshylar Qazaqstan Prezıdenti Nursultan Nazarbaevtyń «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna arnalǵan Joldaýyn tikeleı efırde tamashalady.

Kezdesýde sóz sóılegen RF-daǵy QR elshiliginiń keńesshisi Anatolıı Smırnov Respýblıkanyń ishki jáne syrtqy saıasatynyń qurylýy men damýyndaǵy Elbasy Nursultan Nazarbaevtyń ólsheýsiz úlesin atap ótti. «Qazaqstan barlyq iri jáne shaǵyn memlekettermen ózara tıimdi qarym-qatynas pen tyǵyz ekonomıkalyq baılanys ornatyp jatyr, - dedi dıplomat.

Qarjy ýnıversıtetiniń Joǵary zańgerlik mektebi dırektorynyń orynbasary Talǵat Myqtybaev 1993 jyly qıyn ekonomıkalyq jaǵdaılarǵa qaramastan «Bolashaq» stıpendııasyn bekitý sheshimin qabyldaǵan Nursultan Nazarbaevtyń danalyǵyn, qaısarlyǵyn atap ótti.

Kezdesý sońynda qatysýshylarǵa Qazaqstan Prezıdentiniń qyzmeti jónindegi beınerolık usynyldy. Ony máskeýlik JOO-larda bilim alyp jatqan qazaqstandyq stýdentter, sonyń ishinde «Bolashaq» baǵdarlamasyna qatysýshylar daıyndady.