QR Tuńǵysh Prezıdenti kúni qarsańynda Astanada birqatar qyzyqty sharalar ótkiziledi
ASTANA. 9 qarasha. QazAqparat - Qazaqstandyqtar kóp uzamaı Tuńǵysh Prezıdent kúnin alǵash ret merekeleıdi.
Qazirgi zamanda memlekettiń erekshe mártebesi kóshbasshy tulǵasymen anyqtalady. Ol eldiń qalyptasýynyń barlyq kezeńinde memleket damýynyń baǵytyn aıqyndaıdy. Bizdiń Prezıdentimiz - Elbasy N.Á. Nazarbaevtyń Qazaqstan úshin mundaı tulǵa bolyp tabylatyny sózsiz.
Bizdiń memleketimizdiń táýelsizdik jyldarynda onyń árbir azamaty óz bolashaǵyn óz qolymen salýǵa múmkindik aldy.
1991 jyldan beri mańyzdy ári sheshýshi oqıǵalar oryn aldy. Aýyr jyldary memleket tuǵyryn salýdyń alasapyran jolyna tústik. Keıinnen elimizde bolǵan keń kólemdi ekonomıkalyq, saıası jáne áleýmettik jetistikter Qazaqstan Respýblıkasynyń Tuńǵysh Prezıdenti N.Á.Nazarbaevtyń - halyq tańdaǵan, Qazaqstan memlekettiliginiń negizin salýshy tulǵanyń esimimen baılanysty.
Merek qarsańynda Otanymyzdyń júregi - Astana qalasynda birqatar sharalar ótkizý belgilendi.
16 qarasha - 5 jeltoqsan, sondaı-aq 27 qarasha - 6 jeltoqsan aralyǵynda Táýelsizdik saraıynda tanymal qazaqstandyq fotosýretshiler Vladımır Kýrılovtyń «Astana - Elbasynyń tarıhı erligi», Shúkir Shahaıdyń «Elin súıgen, el súıgen Elbasy» atty kórmeleri, 20 qarasha - 20 jeltoqsan aralyǵynda astananyń kitaphanalarynda - «1 jeltoqsan - Qazaqstan Respýblıkasy Tuńǵysh Prezıdentiniń kúni» atty kitap kórmeleri usynylady. 26 qarashadan bastap Uly Otan soǵysynyń qatysýshylaryna 10 myń teńgelik tólem kartochkalaryn usyný boıynsha aktsııa bastalady.
«Astana arena» stadıonyndaǵy astanalyq mektepter arasynda ótetin «Prezıdenttik test» keshendi sporttyq-oıyn-saýyq estafetasy tamasha sharaǵa aınalady. 1 jeltoqsan kúni Astananyń turǵyndary men qonaqtary qala kınoteatrlarynda rejısser R.Ábdirashevtiń «Balalyq shaǵymnyń aspany» kınofılmin, Beıbitshilik jáne kelisim saraıynda «Astana» estradalyq-sımfonııalyq orkestiriniń kontsertin tamashalaı alady.
Mereke barlyq jerde seziledi. Bul kúni Balalar úıiniń tárbıelenýshileri «Alaý» muz aıdynyna barady, astanalyq turǵyndar úshin saýda ortalyqtarynda merekelik jeńildikter usynylady, al 1 jeltoqsanda dúnıege kelgen balalarǵa syılyqtar beriledi.
