QR Tuńǵysh Prezıdenti qory talantty jastarǵa qoldaý kórsetetin bolady
KÓKShETAÝ. QazAqparat - Aqmola oblysynyń ákimi Málik Myrzalın men Qazaqstan Respýblıkasynyń Tuńǵysh Prezıdenti qorynyń atqarýshy dırektory Qanat Jumabaev eki jaqty áriptestik týraly memorandýmǵa qol qoıdy, dep habarlaıdy «QazAqparat» HAA tilshisi.
Kezdesýde qordyń atqarýshy dırektory №1 oblystyq arnaıy korrektsııalyq mektepke «Montessorı kabıneti» keshenin satyp alýǵa sertıfıkat tapsyrdy.
Oblys basshysy Aqan seri, Birjan sal, Úkili Ybyraı, Balýan Sholaq sııaqty qazaqtyń sańlaq óner tulǵalary shyqqan astanalyq oblysta talantty jastardyń qanattanýyna qoldaý kórsetip kele jatqan Tuńǵysh Prezıdent qorynyń atqaryp otyrǵan jumystaryna rızashylyǵyn bildire otyryp, tabys tiledi.
Qordyń atqarýshy dırektory Qanat Jumabaev óz kezeginde oblystaǵy joǵary jáne arnaýly orta bilim beretin oqý oryndarynda bolyp, kezdesýler ótkizgendigin, talantty jastardyń kóptigin aıtyp, qordyń qarjylyq múmkindikteri sheńberinde qoldaý kórsetetindikterin tilge tıek etti. Qor otandyq ǵylym jáne aqparat tehnologııalaryn damytýǵa óz úlesterin qosqysy keletin talantty jastarǵa arnalǵan «Smart Zholy», «Science Slam», «Ǵylym» festıvali» jobalaryn júzege asyrýda. Bıylǵy jyldyń ózinde qor seksennen astam is-sharany júzege asyrýdy josparlap otyr.
