QR Tuńǵysh Prezıdenti: Elimizde aýqymdy kóp sharýa isteldi dep sanaımyn

NUR-SULTAN. QazAqparat – Atqarylǵan jetistikterdi toqtatpaı, jumysty ary qaraı jalǵastyrý kerek. Bul týraly «Habar» arnasyna bergen suhbatynda Elbasy Nursultan Nazarbaev málim etti, dep habarlaıdy QazAqparat tilshisi.

«Jalpy, elimizde jáne sheteldik sarapshylar da Qazaqstannyń osy jyldardaǵy ósip-órkendeýine oń baǵa berdi. Burynǵy Keńes odaǵynyń aýmaǵyndaǵy respýblıkalardyń ishinde biz eń jyldam reforma jasadyq. Ekonomıkamyz qarqyndy ósti. Bul istegen jumystyń nátıjesi. Sondyqtan biz jaı júrmedik, dúnıejúzilik tájirıbeni paıdalanyp, strategııalyq baǵdarlamalar jasadyq», - dedi Elbasy.

Osy oraıda N. Nazarbaev túrli saladaǵy mańyzdy baǵdarlamalarǵa toqtalyp ótti. Negizgi maqsat – aldyńǵy qatardaǵy 30 eldiń qataryna qosylý.

Sonymen qatar QR Tuńǵysh Prezıdenti Táýelsizdik jyldarynda kóptegen aýrýhanalar men emhanalar, mektepter, balabaqshalar, avtojoldar, temirjoldar, porttar salynǵanyn eske saldy. Budan bólek, N. Nazarbaev kórshiles eldermen shekaralyq máseleler tolyqtaı sheshilgenin atap ótti.

«Endi osynyń qarqynyn toqtatpaı, jumysty ary qaraı jalǵastyrý kerek. Biz shıkizatty satyp, paıda tabýdan ajyrap, basqa ekonomıkaǵa kóshýimiz kerek. Indýstrııalyq baǵdarlama osyǵan negizdelgen. Sonymen qatar, aýyl sharýashylyǵy salasyna ekpin qoıylýda. Sondyqtan kóp sharýa isteldi dep sanaımyn. Meniń býynym qazaqqa qolynan kelgenshe barlyq jaqsylyǵyn jasady. Qanshama ýnıversıtetter ashyldy, EKSPO-2017 boldy, elordamyzda EQYU sammıti ótti», - ol.

Osy oraıda Elbasy Táýelsizdiktiń alǵashqy jyldaryndaǵy qıyndyqtardy umytpaýymyz kerektigin aıtty.