QR Tótenshe jaǵdaılar vıtse-mınıstri Qazaqstan óńirlerindegi qardyń erýine baılanysty jaǵdaıǵa sholý jasady
ASTANA. QazAqparat - Qazir elimizdiń ońtústiginde sý tasqyny qaýpi tolyǵymen seıildi dep aıtýǵa ábden bolady. Ol jaqta qar tolyq ketip, jer kóktep qoıǵan. Bul týraly búgin ótken baspasóz máslıhatynda QR Tótenshe jaǵdaılar vıtse-mınıstri Valerıı Petrov aıtty.
«Batys Qazaqstan oblysynda da qar ketti. Al Aqtóbe oblysynyń soltústiginde áli biraz qar bar. Ondaǵy jaǵdaıdy tolyqtaı baqylaýda ustap otyrmyz. Qaýipti degen aımaqtarda tikushaqtarymyz kúndiz-túni kezekshilik atqaryp jatyr», - dedi ol.
Mınıstr orynbasarynyń aıtýynsha, Shyǵys Qazaqstan oblysynda tek taýly jerlerde ǵana qar qalǵan. Ońtústik jaǵy túgeldeı qardan aryldy. «Qazir qaýipti jaǵdaı, eń birinshi kezekte, Soltústik Qazaqstan, Aqtóbe, Pavlodar, Qostanaı oblystarynda oryn alýy múmkin», - dedi ol. Onyń qaýpi boıynsha, Aqmola oblysyndaǵy qar sýy Soltústik Qazaqstan oblysyna qaraı aǵýy múmkin. «Sondyqtan biz búginde qaýip tónýi múmkin degen aımaqtarǵa qosymsha kúshterimizdi jiberdik. Qazir TJM júıesi táýlik boıy qyzmet atqaryp otyr. 5 myńǵa jýyq qyzmetker jumyldyrylǵan», - dep atap ótti V. Petrov.
