QR Tótenshe jaǵdaılar mınıstrliginiń 4 basshy qyzmetkeri attestattaýdan súrindi
ASTANA. 19 qarasha. QazAqparat - QR Tótenshe jaǵdaılar mınıstrliginiń memlekettik órtke qarsy qyzmet organdarynyń 21 laýazymdy tulǵasy kezekten tys attestattaýdan ótti. Bul týraly búgin brıfıng barysynda vedomstvonyń kadrlyq qamtamasyz etý departamentiniń dırektory Erjigit Qultaev málim etti.
«Aǵymdaǵy jyldyń 21 mamyrynan 12 qarashasyna deıin QR Prezıdentiniń janyndaǵy Joǵary attestattaý komıssııasynda mınıstrlik memlekettik órtke qarsy qyzmet organdarynyń 21 qyzmetkeri kezekten tys attestattaýdan ótti. Onyń ishinde ortalyq apparat qurylymdyq bólimsheleriniń 3 basshysy, Órtke qarsy qyzmet komıtetiniń tóraǵasy men onyń 2 orynbasary, Kókshetaý tehnıkalyq ınstıtýtynyń bastyǵy, Respýblıkalyq daǵdarys ortalyǵynyń bastyǵy men onyń orynbasary jáne oblystar, Astana men Almaty qalalary Tótenshe jaǵdaılar departamentteri bastyqtarynyń 12 orynbasary bar», - dep atap ótti departament basshysy.
Onyń aıtýynsha, olardyń qatarynda 3 adam kadr rezervine qabyldaýǵa nemese joǵary laýazymdarǵa jyljytýǵa usynyldy. Taǵy 14 qyzmetker attestattaýdan sátti ótip, atqaratyn laýazymdaryna laıyq dep tanylyp otyr. 2 qyzmetker laýazymdaryna sáıkes kelmegen jáne tómendetilýge usynyldy. Sonymen qatar 2 basshy qyzmetker laýazymyna sáıkes kelmegendikten, basqa qyzmetke taǵaıyndaýǵa usynyldy.
