QR Táýelsizdik kúniniń qurmetine 49 qaraǵandylyq azamat memlekettik marapatqa ıe boldy

QARAǴANDY. 13 jeltoqsan. QazAqparat - Qaraǵandydaǵy Kenshiler mádenıet úıinde Qazaqstan Respýblıkasy Táýelsizdik kúnine arnalǵan saltanatty jıyn bolyp ótti.

Jıynda sóz sóılegen aımaq basshysy Ábilǵazy Qusaıynov táýelsiz Qazaqstandy qurýǵa oblys turǵyndary eleýli úles qosyp otyrǵanyn atap ótti.

«El Prezıdentiniń Jarlyǵymen Táýelsizdik kúni qarsańynda qaraǵandylyqtardyń úlken toby joǵary memlekettik syılyqtardy ıelendi. Búgin Nursultan Nazarbaev eki jerlesimizdi marapattady. Eńbek ardageri, Qazaqstan Jazýshylar odaǵynyń aqsaqaldar keńesiniń múshesi Kákimbek Salyqov úshinshi dárejeli «Barys» ordenin ıelense, Shahtınsk qalasynyń «Qurylysmet» kásipornynyń jumyskeri Lıýbov Rekına «Qurmet» ordeniniń ıegeri atandy», - dep habarlady Á.Qusaıynov.

Saltanatty jıynda oblys ákimi el Prezıdentiniń atynan memlekettik syılyqtardy tabystady.

Oblystyq ákimdikten habarlaǵandaı, Táýelsizdik kúni qarsańynda QR Prezıdentiniń Jarlyǵymen memlekettik jáne qoǵamdyq qyzmettegi eńbekteri, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan úlesteri úshin 49 qaraǵandylyq azamat marapattaldy.