QR Táýelsizdiginiń 30 jyldyǵy: Shveıtsarııada mereıtoılyq poshta markasy shyqty

BERN QazAqparat – Qazaqstannyń Shveıtsarııadaǵy Elshiliginiń bastamashylyq etýimen Qazaqstan Respýblıkasy Táýelsizdiginiń 30 jyldyǵyna oraı mereıtoılyq poshta markasy shyǵaryldy, dep habarlaıdy QazAqparat.

QR Syrtqy ister mınıstrliginen málim etkendeı, poshta markalary Elshiliktiń kúndelikti hat-habarlarynda, sondaı-aq kádesyı retinde paıdalanylady.

Shveıtsarııada qazirgi zamanǵy tsıfrlyq tehnologııalar men elektrondy qyzmetterdiń joǵary damýyna qaramastan, poshta-korrespondentsııasy qoǵam ómirinde mańyzdy oryn alady.

Karantın kezeńinde Shveıtsarııada onlaın-saýdanyń artýyna baılanysty poshta qyzmetterin paıdalaný birneshe ese ósti. Syılyqtar, taýarlarǵa tapsyrys, hattar salynǵan konvertter – búgingi kúni poshta qyzmeti arqyly sálemdemeler men konvertterdiń kóptegen sany ótip jatyr.

«Qazirgi ýaqytta biz kún saıyn mıllıonnan astam sálemdeme óńdeımiz. Bul Post tarıhyndaǵy absolıýtti rekord», – dep atap ótti Swiss Post baspasóz ókili Jaklın Bıýlman.

Jalpy alǵanda, Shveıtsarııadaǵy pochta jáne poshta markalarynyń tarıhy orta ǵasyrlardan bastaý alady jáne álemniń túkpir-túkpirindegi fılatelısterdiń nazary men qyzyǵýshylyǵyn týǵyzýda.