QR Tabıǵı monopolııalardy retteý agenttiginiń burynǵy basshysy M.Ospanov 250 mln teńgeden astam aıyppul tóledi
ASTANA. QazAqparat - QR Tabıǵı monopolııalardy retteý agenttiginiń burynǵy tóraǵasy Murat Ospanov 250 mln teńgeden astam aıyppul tóledi. Bul týraly Astana qalalyq sotynyń baspasóz qyzmetinen habarlady.
Eske sala keteıik, 2015 jyly 13 aqpanda sot úkimine sáıkes M.Ospanovqa 1 mıllıard 101 mıllıon 60 myń teńge kóleminde aıyppul tóleý jazasy qoldanyldy. Onyń múlki tárkilenip, memlekettik qyzmetti júzege asyrýǵa baılanysty jáne jergilikti basqarý qyzmetinen ómiriniń sońyna deıin shettetildi. Murat Ospanov QR QK 366 baby 4 bólimi men 24 babynyń 3 bólimine sáıkes aıypty dep tanyldy. Qazirgi zańnamaǵa sáıkes sottalýshy ótinish jazyp, №2 Esil aýdandyq sotynyń 2015 jylǵy 26 naýryzdaǵy qaýlysyna sáıkes aıyppuldy alty aı ishinde bólip tóleý múmkindigine ıe boldy.
«Búginde sottalǵan Murat Ospanov 250 mıllıon teńgeden astam aıyppul tóledi», - delingen habarlamada.
