QR Tabıǵı monopolııalardy retteý agenttigi munaı ónimderine shekti baǵany aıqyndaý qaǵıdalaryn qabyldady
ASTANA. 16 naýryz. QazAqparat - Qazaqstan Respýblıkasy Tabıǵı monopolııalardy retteý agenttigi baǵalaryna memlekettik retteý belgilengen munaı ónimderin bólshek saýda arqyly ótkizýge shekti baǵalardy belgileý qaǵıdasyn ázirledi.
Bul týraly Agenttiktiń baspasóz qyzmetinen habarlandy.
«Qabyldanǵan qaǵıdaǵa sáıkes, munaı ónimderine baǵalardy belgileý barysyna negizinen - álemdik baǵa belgileý boıynsha munaıǵa jáne munaı ónimderiniń baǵasy, sondaı-aq reseılik áser etý faktory men qazaqstandyq munaı ónimderi naryǵynyń ereksheligi eskeriletin bolady. Budan bólek, munaı ónimderiniń bólshek saýdadaǵy shekti baǵasy munaıdyń álemdik baǵasyna qaraı olardy bólshek saýdada ótkizýge arnalǵan shekti baǵa mánderi kestesiniń negizinde aıqyndalady. Al atalmysh kesteni Munaı jáne gaz mınıstrligi ázirlep, ony Tabıǵı monopolııalardy retteý agenttigine aı saıyn tabys etedi», - delingen baspasóz aıǵaǵynda.
Sonymen qatar, qaǵıdalarǵa sáıkes, munaı ónimderin óndirý men ótkizý monıtorıngi boıynsha Munaı jáne gaz mınıstrligi shekti baǵany belgileý úshin Agenttikke tıisti málimetter joldaıtyn bolady. Bul rette bólshek saýda naryǵyndaǵy satýshylar joǵaryda atalǵan munaı ónimderiniń bekitilgen shekti baǵalaryn asyrmaýǵa tıis.
Agenttik bekitken qaǵıdalar Qazaqstan Respýblıkasy Úkimetiniń qaýlysymen qabyldandy jáne aǵymdaǵy jylǵy 25 naýryzdan bastap qoldanysqa engiziledi.
Esterińizge sala keteıik, elimizde munaı ónimderine shekti baǵany buǵan deıin Munaı jáne gaz mınıstrligi aı saıyn bekitip kelgen bolatyn.
