QR Syrtqy saýda palatasy otandyq eksporttaýshylardyń Qytaıǵa taýar eksportyna qoldaý jasaıdy
ASTANA. QazAqparat - QR Premer-Mınıstri Kárim Másimovtiń Beıjińge resmı sapary barysynda Qazaqstannyń Syrtqy saýda palatasy men «Chjýn sıntszıan» Sınzıan memlekettik óndiristik-qurylys korporatsııasy halyqaralyq kompanııasy arasynda aýyl sharýashylyǵy salasyndaǵy yntymaqtastyq týraly memorandým jasaldy.
Aıta keteıik, atalǵan qujat qazaqstandyq aýyl sharýashylyǵy ónimderin óndirýshiler men eksporttaýshylary úshin ózderiniń taýarlaryn Syrtqy saýda palatasy arqyly «jalǵyz tereze» qaǵıdaty» boıynsha Qytaıǵa jóneltýge septigin tıgizedi. Budan bólek, kásipkerlerge Qytaı Halyq Respýblıkasynan ınvestıtsııa tartý jáne tehnologııalar transferin júzege asyrý múmkindigi de usynylatyn bolady.
«Qazirgi qıyn-qystaý kezeńde shet eldermen yntymaqtastyq ornatýdyń mańyzy óte zor. Qytaıǵa ónim jetkizý kezinde qıynshylyqtarǵa tap bolatyn otandyq eksporttaýshylardyń osyǵan qatysty saýaldaryn eskerip, biz qos eldiń bıznes qaýymdastyqtary aldynda úlken perspektıvalarǵa jol ashatyn jańa iskerlik format oılastyrdyq. Atalǵan tetik elder arasynda ornyqty seriktestiktiń kepiline aınalatynyna senimdimiz», - dedi qytaılyq áriptesterimen kezdesý barysynda Qazaqstan Syrtqy saýda palatasynyń basqarma tóraǵasy Meıirbek Májıtov.
Onyń sózine qaraǵanda, iskerlik kelissózder barysynda taraptar sút, maı óndirisi, ósimdik sharýashylyǵy, turmystyq qyzmet kórsetý salasy sekildi sektorlardy qamtıtyn óńdeýshi ónerkásipte yntymaqtastyqtyń negizgi baǵyttary aıqyndalǵan. Onyń aıtýynsha, Qazaqstannyń syrtqy saýda palatasy muryndyq bolǵan qazaqstandyq delegatsııanyń Beıjińge sapary otandyq kásipkerler úshin úlken perspektıvalarǵa jol ashady.
«Kelissózder barysynda taraptar óńdeýshi ónerkásiptegi yntymaqtastyqtyń negizgi tarmaqtaryn da aıqyndady. Sonyń ishinde negizinen sút, ósimdik maılary óndirisi, ósimdik sharýashylyǵy, jemis jıdek daqyldaryn ósirý, mal sharýashylyǵy, tamshylatyp sýarý materıaldaryn daıarlaý, sonymen qatar, turmystyq qyzmet kórsetý salalaryna basymdyq berilmek», delingen baspasóz baıanynda.
Jalpy Qazaqstannyń syrtqy saýda palatasy Beıjiń saparynyń otandyq bıznes úshin úlken perspektıvalar ashyp, ekijaqty ózara tıimdi yntymaqtastyqty damytýǵa septigin tıgizedi dep sanaıdy.
