QR Syrtqy ister mınıstrligi men Human Rights Watch «Qasiretti qańtar» oqıǵalaryn tergeý boıynsha dıalogty bastady

NUR-SULTAN. QazAqparat – Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi Human Rights Watch halyqaralyq úkimettik emes uıymynyń atqarýshy dırektory Kennet Rotpen beınekonferentsııa formatynda kezdesý ótkizdi. Bul týraly QazAqparat QR SІM baspasóz qyzmetine silteme jasap habarlaıdy.

Taraptar Qazaqstandaǵy «Qasiretti qańtar» oqıǵalary aıasynda adam quqyqtary salasyndaǵy halyqaralyq normalar men standarttardy saqtaý máselelerin talqylady.

«Qazaqstan Prezıdentiniń tapsyrmasyna sáıkes, memlekettiń quqyq qorǵaý organdary qarýly tártipsizdikterge elimizdiń zańnamasyna sáıkes beıtarap tergeý júrgizýdi tolyq qamtamasyz etýi tıis», - dedi Syrtqy ister mınıstri.
Óz kezeginde K. Rot «biz Qazaqstan bıliginiń dıalog pen yntymaqtastyqqa ashyqtyǵyn jáne adam quqyqtarynyń halyqaralyq standarttaryn saqtaý jónindegi mindettemelerin rastaýyn quptaımyz», - dep atap ótti.

Kezdesý barysynda QR Syrtqy ister mınıstrligi men Human Rights Watch uıymynyń qańtar oqıǵalaryn obektıvti tergeýge múddeli ekeni atap ótildi. M.Tileýberdi qazaqstandyq tergeý organdary azamattarymyz ben halyqaralyq qaýymdastyqty alańdatyp otyrǵan árbir naqty jaǵdaıdy qarastyrýǵa daıyn ekenin rastady.

Kezdesý qorytyndysy boıynsha adam quqyqtaryn saqtaý máseleleri jóninde jumys baılanystary men mazmundy dıalogty jalǵastyrý týraly ýaǵdalastyqqa qol jetkizildi.