QR Syrtqy ister mınıstrligi Qazaqstannyń Nobel syılyǵyn tapsyrý saltanatyna qatyspaý sebebine túsinik berdi
ASTANA. 19 qarasha. QazAqparat /Gúlmıra Álıakparova/ - Qazaqstannyń Oslodaǵy (Norvegııa) isteriniń ýaqytsha senimdi ókili josparly issaparda bolýyna baılanysty 2010 jylǵy Nobel syılyǵyn tapsyrý saltanatyna Qazaqstannyń atynan eshkim qatyspaıdy.
Bul týraly búgin ótken brıfıngide QR Syrtqy ister mınıstrliginiń baspasóz hatshysy Іlııas Omarov málim etti. «Munda eshqandaı saıası astar joq», - dep qadap aıtty ol.
«Norvegııadaǵy qazaqstandyq elshi qyzmetin qosymsha atqarady, elshimizdiń shtab-páteri Gaagada ornalasqan, al Qazaqstannyń Norvegııadaǵy isteriniń ýaqytsha senimdi ókili josparly issaparda bolady», - dep naqtylady Omarov.
Buǵan deıin birqatar sheteldik aqparat agenttikteri 10 jeltoqsan kúni ótetin aǵymdaǵy jylǵy Nobel syılyǵyn tapsyrý saltanatyna Reseı, Qazaqstan, Kýba, Marokko, Irak jáne Qytaı elderi qatysýdan bas tartqanyn habarlaǵan bolatyn.
Aıta keteıik, 2010 jylǵy Nobel syılyǵy Qytaıdaǵy «adamdardyń quqyqtary úshin zorlyq-zombylyqsyz uzaq kúres úshin» 54 jastaǵy qytaılyq Lıý Sıaoboǵa berildi. Bir jyl buryn Qytaı soty ony memlekettik bılikti qulatpaq bolǵan áreketi úshin 11 jylǵa bas bostandyǵynan aıyrý jazasyna kesken edi.
