QR Syrtqy ister mınıstri EQYU Bas hatshysy men Majarstan ulttyq ekonomıka mınıstrimen kezdesti
ASTANA. QazAqparat - Halyqaralyq «EKSPO-2017» kórmesiniń sheńberinde ótip jatqan «Energetıkanyń turaqty damýyn qamtamasyz etý» atty mınıstrlik konferentsııasy aıasynda Syrtqy ister mınıstri Qaırat Ábdirahmanov ekijaqty kezdesýler ótkizdi, dep habarlaıdy QR Syrtqy ister mınıstrliginiń baspasóz qyzmeti.
Qaırat Ábdirahmanov Eýropadaǵy qaýipsizdik jáne yntymaqtastyq uıymynyń (EQYU) Bas hatshysy Lamberto Zanermen kezdesý barysynda EQYU kún tártibi máseleleriniń kesheni boıynsha Qazaqstannyń konstrýktıvti dıalogty jalǵastyrýǵa daıyn ekenin jetkizdi.
Taraptar eýropalyq qaýipsizdik, EQYU joryq mıssııalarynyń jumysy, ekstremızm men radıkalızatsııalanýmen kúresý, Ortalyq Azııadaǵy sý resýrstaryn basqarý týraly dıalog jáne EQYU-nyń Aýǵanstanmen ózara yqpaldasý perspektıvalary boıynsha pikir almasty.
EQYU-nyń eýrazııalyq ólshemin odan ári kúsheıtýdyń mańyzy atalyp ótti.
L. Zaner Qazaqstandy Halyqaralyq «EKSPO-2017» kórmesin sátti uıymdastyrýymen quttyqtady. 15-16 maýsymda kórme sheńberinde 130-den astam dıplomatııalyq jáne Uıym memleketteriniń sarapshy ortalary ókilderiniń qatysýymen EQYU Ekonomıkalyq-ekologııalyq forýmyna ekinshi daıyndyq kezdesýi ótedi.
Majarstan ulttyq Ekonomıka mınıstri Mıhaı Vargamen kezdesý barysynda ekonomıkalyq yntymaqtastyq jónindegi úkimetaralyq komıssııa men iskerlik keńesiniń áleýetin tıimdi paıdalaný mańyzy aıtyldy. Qazaq-majar aýyl sharýashylyq tikeleı ınvestıtsııalar qorynyń eleýli áleýeti bar ekendigi sóz boldy.
M. Varga qazaq-majar qatynastary ornatylǵaly beri beri olardy damytýdaǵy Qazaqstan Prezıdenti Nursultan Nazarbaevtyń erekshe rólin basyp aıtty. Majarstan mınıstri jaqynda iske qosylǵan Astana-Býdapesht tikeleı áýe reısi iskerlik jáne gýmanıtarlyq baılanystardyń odan saıyn damýyna oń áserin tıgizetindigine senimdi.
Taraptar Qazaqstan men Majarstannyń «Bir beldeý, bir jol» jobasyna qatysý perspektıvalaryn talqylady. Majarstandyq saıasatker sonymen qatar Ortalyq Azııa men Vyshegrad toby arasyndaǵy dıalogty ornatý ıdeıasyn qarastyrýdy usyndy.
