QR Syrtqy ister mınıstri alǵash ret resmı saparmen Bahreın Koroldigine bardy
Bahreın tarapy Qazaqstannyń syrtqy saıası vedomstvosy basshysynyń saparyna erekshe mán berdi.
Mınıstrdi Bahreın Koroli Hamad ben Isa Ál-Halıfa qabyldap, oǵan QR Prezıdenti Qasym-Jomart Toqaevtyń atynan jyly lebizin jetkizdi.
M. Tileýberdi suhbattasyn Qazaqstannyń saıası jáne ekonomıkalyq jańǵyrýynyń jańa kezeńimen tanystyrdy.
Óz kezeginde Korol QR-diń qazirgi damý qarqynyn joǵary baǵalap, Qazaqstan halqynyń ıgiligi úshin júrgizilip jatqan Prezıdent reformalaryna qoldaý bildirdi.
Qazaqstan-Bahreın saıası ózara is-qımylynyń damý serpinin eskere otyryp, taraptar dıalogty joǵary deńgeıde jalǵastyrýdyń mańyzyn atap ótti.
Saýda-ekonomıkalyq baılanystardy keńeıtý maqsatynda kólik-logıstıka máselelerin sheshý úshin birlesken kúsh-jiger jumsaýǵa kelisti.
Sondaı-aq, álemdegi halyqaralyq jaǵdaı, óńirlik jáne jahandyq qaýipsizdik máseleleri boıynsha pikir almasý boldy.
Premer-Mınıstrdiń orynbasary Halıd bın Abdýlla Ál-Halıfamen kelissóz barysynda taraptar túrli salalardaǵy ekijaqty yntymaqtastyqty tereńdetý joldaryn qarastyrdy.
Qazaqstandyq tarap Bahreın Taıaý Shyǵystaǵy elimizdiń mańyzdy seriktesi ekenin atap ótti.
«Ózara saıası qoldaýdyń arqasynda biz qazir ózara senim men belsendi yntymaqtastyqqa negizdelgen dostyq qarym-qatynastamyz», - dedi M.Tileýberdi.
Taraptar eki eldiń ózara is-qımylynyń joǵary deńgeıin oń baǵalady, bul rette saýda-ekonomıkalyq saladaǵy qolda bar áleýet tolyq kólemde paıdalanylmaıtynyn atap ótti.
Osyǵan baılanysty Qazaqstan men Bahreın arasyndaǵy yntymaqtastyqtyń jol kartasyn ázirleý týraly ýaǵdalastyq jasaldy, onda odan ári ózara is-qımyldyń naqty baǵyttary kórsetiledi.
Syrtqy ister mınıstri Abdýllatıf ben Rashıd Ál-Zaıanımen kezdesý barysynda saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ekijaqty qatynastardyń barlyq máseleleri talqylandy.
Mınıstrler ózara qyzyǵýshylyq týdyratyn aımaqtyq jáne halyqaralyq máseleler boıynsha pikir almasty.
«Ortalyq Azııa – Shyǵanaq arab memleketteriniń yntymaqtastyq keńesi» dıalog platformasy sheńberinde óńiraralyq kooperatsııaǵa erekshe nazar aýdaryldy.
Bahreın tarapy ekijaqty qatynas tarıhyndaǵy Qazaqstan SІM basshysynyń Bahreınge alǵashqy resmı saparyn oń baǵalap, onyń barlyq salalardaǵy yntymaqtastyqty odan ári arttyrýǵa qosymsha serpin beretinine senim bildirdi.
Sapar baǵdarlamasy Bahreınniń saýda-ónerkásip palatasyndaǵy kelissózben aıaqtaldy.
SÓP Tóraǵasy Samır Nass jáne Bahreın bıznes toptarynyń ókilderimen saýda-ekonomıkalyq jáne ınvestıtsııalyq baılanystardy jandandyrý joldary, sondaı-aq «Astana» halyqaralyq qarjy ortalyǵy men Bahreınniń Halyqaralyq ıslam qarjy naryǵy arasyndaǵy yntymaqtastyq qaraldy.
Bıznesmender arasyndaǵy tikeleı baılanystardy yntalandyrý jáne yntymaqtastyqtyń perspektıvaly salalaryn aıqyndaý úshin eki el arasynda iskerlik keńes qurý týraly ýaǵdalastyqqa qol jetkizildi.
Kelissóz qorytyndysy boıynsha taraptar ózara saýdany keńeıtýge jáne ınvestıtsııalar kólemin ulǵaıtýǵa, sondaı-aq ekonomıkanyń túrli sektorlarynda kooperatsııany damytýǵa baǵyttalǵan ózara is-qımyldy jalǵastyrýǵa ýaǵdalasty.
Foto: gov.kz
