QR Statıstıka agenttiginiń qyzmetkerleri aldyna zańnama talaptaryn mindetti túrde eskerý maqsaty qoıylyp otyr - Á. Smaıylov
ASTANA. Aqpannyń 16-sy. QazAqparat /Rýslan Ǵabbasov/ - QR Statıstıka agenttiginiń qyzmetkerleri aldyna zańnama talaptaryn mindetti túrde eskerý maqsaty qoıylyp otyr. Bul týraly búgin Astanada ótken brıfıngte atalǵan agenttiktiń tóraǵasy Álıhan Smaıylov málim etti,
dep habarlaıdy QazAqparat.
Esterińizge sala keteıik, Statıstıka agenttiginiń burynǵy basshylyǵyna qatysty qylmystyq is qozǵalǵan edi. Olar ótken jyldaǵy halyq sanaǵyna arnalǵan memlekettik qarjyny jymqyrý faktisi boıynsha aıyptalǵan bolatyn.
«Kináli adamdarǵa qatysty qozǵalǵan qylmystyq is faktisiniń ózi barlyq qyzmetkerlerdi tártipke shaqyryp otyr. Bul shara óz kezeginde yqpal etý dárejesine ıe boldy»,-dedi ol.
«Atap aıtqanda, kadrlardyń rotatsııasy júrgizildi. Onyń ishinde bizdiń agenttiktiń qarjy departamentinde osyndaı sharalar ótkizildi. Basshylyqqa abyroıy taza, tıisti jumys tájirıbesi bar adamdar taǵaıyndaldy», - dedi Agenttik basshysy.
Onyń sózine qaraǵanda, Agenttiktiń qarjy departamentiniń burynǵy dırektory qyzmetten óz erkimen ketken.
Osy turǵyda Á. Smaıylov olardyń aldyna zańnama talaptaryn mindetti túrde eskerý maqsatty qoıylyp otyrǵandyǵyn jetkizdi. «Sonymen birge, barlyq qyzmetkerlermen profılaktıkalyq jumystar júrgizilýde. Sondyqtan Agenttik tóraǵasy vedomstvo boıynsha jemqorlyqqa qarsy is-qımyldar jaǵdaıyna jaýap beretinin eskersek, men ózim budan burynǵy jaǵdaı qaıtalanbas úshin barlyq tıisti sharalardy iske asyrýdamyn», - dedi ol.
