QR Statıstıka agenttigi kásibı merekelerine oraı ashyq esik kúnin ótkizdi
ASTANA. 27 qazan. QazAqparat /Gúlmıra Alıakparova/ - Qazaqstan Respýblıkasynyń Statıstıka agenttigi 8 qarasha - statıstıka salasy qyzmetkerleriniń kásibı merekesine oraı dástúrli ashyq esik kúnin ótkizdi.
Oǵan kelgen memlekettik organdardyń ókilderi, kitaphanashylar, mektep, arnaıy jáne joǵary bilim berý mekemeleriniń mamandary Agenttiktiń jumysymen tanysyp, memlekettik statıstıkanyń damý bolashaǵyna kóz jetkizdi. Shara barysynda qazaqstandyq statıstıkada jańa aqparattyq tehnologııalardyń engizilýi men qoldanylýy máselelerine erekshe kóńil bólindi. Ásirese «Taldaý» aqparattyq-taldaý júıesi kómegimen statıstıkalyq aqparatty taratýǵa arnalǵan zamanaýı ádister keńinen talqylandy.
Statıstıka agenttigi «Taldaý» ATJ-ni qurýdyń alǵashqy kezeńin sátti aıaqtady. Júıe qoldanýshylar úshin aǵymdaǵy jyldyń mamyrynan bastap qoljetimdi. Eger bastapqyda júıeden 300-ge jýyq statıstıkalyq kórsetkishti kórýge múmkin bolsa, búgin qoldanýshylar Qazaqstannyń damý jaǵdaıyna 600-den astam statıstıkalyq kórsetkish boıynsha taldaý jasaı alady. Al aldaǵy jyly olardyń sany 2 myńǵa jetkiziletin bolady.
Agenttik usynǵan málimetterge súıensek, jyl saıyn jasalatyn saýalnamalar ornalastyrylǵan aqparattardyń kólemi boıynsha qoldanýshylardyń qanaǵattaný deńgeıi 2008-2010 jyldar aralyǵynda 75-ten 85 paıyzǵa, aqparattardy usyný formasy boıynsha 40-tan 50 paıyzǵa, al derekterdiń naqtylyǵy boıynsha 60-tan 70 paıyzǵa artty.
«Elektrondy úkimet» baǵdarlamasy aıasynda 2010 jyly «e-Statıstıka» Integraldy aqparattyq júıesi iske qosyldy. Onyń sheńberinde respýblıkalyq aýqymdaǵy aqparattyq júıeni qurý josparlanyp otyr.
