QR Statıstıka agenttigi 5 jylǵa arnalǵan QAZSTAT jobasynyń júzege asyrylý barysymen tanystyrdy
ASTANA. QazAqparat - 2016 jylǵa qaraı Statıstıka agenttigine kásiporyndar tapsyratyn esepterdiń ortasha sany 16 paıyzǵa, al statıstıkalyq eseptilik nysandaryn toltyrýǵa ketetin ýaqyt 40 paıyzǵa qysqarady. Bul týraly búgin QR statıstıka agenttiginde «QAZSTAT: ulttyq statıstıka júıesin nyǵaıtý jónindegi jobany» iske asyrý barysymen tanystyrǵan agenttik tóraǵasy Álıhan Smaıylov aıtty.
Onyń málimetinshe, agenttik 5 jyldyq QAZSTAT jobasyn byltyr engizgen bolatyn. Joba halyqaralyq tájirıbeni esepke ala otyryp, Qazaqstannyń barlyq statıstıka júıesin jetildirýge baǵyttalǵan. Germanııanyń Statıstıkalyq ofısi basqaratyn 6 sheteldik statıstıkalyq ofıstiń Konsortsıýmy osy jobany iske asyrý boıynsha Agenttiktiń Tvınıng-áriptesi bolyp tabylady.
«Joba Agenttiktiń jáne statıstıkalyq aqparatty túzetin basqa vedomstvolardyń ádisnamalyq jáne taldamalyq áleýetin nyǵaıtýǵa baǵyttalǵan. Jobany iske asyrý barysynda halyqaralyq standarttarǵa sáıkes 50-den astam ádisteme ázirlenip, jetildirildi. Sonymen qatar, jańa standarttar, jikteýishter, nusqaýlyqtar engizildi», - dep atap ótti agenttik tóraǵasy.
Onyń aıtýynsha, paıdalanýshylardyń únemi ózgerip turatyn jańa qajettilikterine jedel den qoıý, sheshim qabyldaýda tıimdi úderis úshin ulttyq statıstıka júıesin jaqsartý da oryndalyp jatqan jumystyń nátıjesin kórsetedi.
«Derekterdi jınaý sapasy men qamtylýy jaqsarady, respondentterge júkteme tómendeıdi. Atap aıtqanda, 2016 jylǵa qaraı Statıstıka agenttigine kásiporyndar tapsyratyn esepterdiń ortasha sany 16 paıyzǵa, al statıstıkalyq eseptilik nysandaryn toltyrýǵa ketetin ýaqyt 40 paıyzǵa qysqarady», - dedi Á. Smaıylov.
Sharaǵa Germanııanyń «DESTATIS» statıstıkalyq keńsesiniń prezıdenti Roderıh Egelen men atalǵan jobanyń Dúnıejúzilik banktegi jetekshisi Mýstafa Dınch qatysyp, QAZSTAT jobasynyń oıdaǵydaı júzege asyrylyp kele jatqanyn atap ótti.
