QR sportshylary Beıjiń Olımpıadasynyń lıtsenzııasy úshin 50-ge jýyq týrnırge qatysady

NUR-SULTAN. QazAqparat – Beıjiń qysqy Olımpıadasy qarsańynda Qazaqstan sportshylary 50-ge jýyq lıtsenzııalyq týrnırge qatysady. Bul jaıynda Senat depýtattarynyń saýalyna QR Mádenıet jáne sport vıtse-mınıstri Nurqısa Dáýeshovtiń jaýabynda aıtylǵan, dep habarlaıdy QazAqparat tilshisi.

«2021 jylǵy 2 qyrkúıekte Premer-Mınıstrdiń orynbasary E.Toǵjanovtyń tóraǵalyǵymen buqaralyq sportty damytý jáne Beıjiń qalasynda (Qytaı) ótetin 2022 jylǵy XXIV qysqy Olımpıada oıyndaryna daıyndyq máseleleri boıynsha múddeli memlekettik organdardyń, barlyq óńirler ákimderi orynbasarlarynyń, bas jattyqtyrýshylardyń, qysqy sport túrleri boıynsha federatsııalardyń, Ulttyq olımpıada komıtetiniń qatysýymen keńeıtilgen keńes ótti.

Onda, tıisinshe, qysqy sport túrlerin damytýdyń problemalyq máseleleri boıynsha hattamalyq tapsyrmalar berildi. Sondaı-aq, qysqy sport túrleri boıynsha Qazaqstan Respýblıkasynyń shtattyq qurama komandalary bas jattyqtyrýshylardyń jeke basshylyǵymen bekitilgen jeke daıyndyq josparlaryna sáıkes qysqy Olımpıada oıyndaryna belsendi daıyndalýda», - delingen vıtse-mınıstr jaýabynda.

Onyń dereginshe, 2020 jyldan bastap 2022 jylǵy qysqy Olımpıada oıyndaryna lıtsenzııalardy jeńip alý boıynsha túrli álemdik lıtsenzııalyq, reıtıngilik týrnırler ótkiziledi. Qazaqstandyq sportshylar, sondaı-aq basqa elderdiń sportshylary da osy týrnırlerge qatysa otyryp, Olımpıada oıyndaryna qatysý úshin reıtıngilik upaı jınaıdy.

«Sońǵy lıtsenzııalyq týrnır 2022 jyldyń qańtar aıynda ótedi. 2022 jylǵy qańtar aıynyń sońynda reıtıngilik týrnırlerdiń qorytyndylary shyǵarylyp, lıtsenzııalardyń sany aıqyndalatyn bolady. Aıta ketý kerek, Olımpıada oıyndarynyń aldynda sportshylarymyz 50-ge jýyq lıtsenzııalyq týrnırge qatysýdy josparlap otyr. Qazaqstandyq sportshylar shańǵy jarysy, bıatlon, konkımen júgirý sporty, short-trek, frıstaıl-mogýl, frıstaıl akrobatıka jáne tuǵyrdan shańǵymen sekirý boıynsha irikteý jarystaryna qatysady», - dedi Nurqısa Dáýeshov.