QR SІM Reseıden Aıgúl Saılybaevanyń isi boıynsha kúdiktilerdiń ustalǵany týraly aqparat suratty
ASTANA. KAZINFORM – Qazaqstan Respýblıkasynyń Syrtqy ister mınıstrligi Reseı aýmaǵynda marqum bolǵan eks-sýdıa Aıgúl Saılybaevanyń kúıeýi men enesi ustaldy degen aqparatqa qatysty túsinikteme berdi.
Іzdeýde júrgen azamattardyń ustalǵany jónindegi málimetti 23 jeltoqsanda Aıgúl Saılybaevanyń aǵasy Qanat Saılybaev áleýmettik jelidegi paraqshasynda jarııalaǵan.
– Aleksandr Dontsov pen onyń anasy Natalıa Dontsovanyń Máskeýde ustalyp, polıtsııaǵa jetkizilgeni týraly aqparat tústi. Qazir olardy Qazaqstanǵa ekstradatsııalaý múmkindigi qarastyrylyp jatyr. Dıplomatııalyq máseleler men birneshe azamattyqtyń bolýy sebepti barlyq rásimder uzaqqa sozylýy múmkin, – delingen jazbada.
Kazinform agenttigi tilshisiniń resmı saýalyna jaýap bergen QR Syrtqy ister mınıstrligi mynadaı málimdeme jasady:
– Qazaqstan Respýblıkasynyń Syrtqy ister mınıstrliginde Reseı Federatsııasynyń quzyrly organdarynan Natalıa men Aleksandr Dontsovtardyń ustalǵany týraly resmı aqparat joq. Osy aqparattarǵa baılanysty Reseı Federatsııasynyń quzyrly organdaryna resmı saýal jiberildi, – dep habarlady vedomstvonyń baspasóz qyzmeti.
SІM ókilderi ekstradıtsııa máseleleri quqyq qorǵaý organdarynyń quzyretine jatatynyn jáne qoldanystaǵy zańnama aıasynda qaralatynyn da naqtylady.
Eske sala keteıik, 9 jeltoqsanda Aleksandr Dontsov pen Natalıa Dontsovaǵa Qazaqstanda Aıgúl Saılybaevany azaptaý deregi boıynsha qozǵalǵan qylmystyq is aıasynda izdeýge jarııalanǵan.
Sonymen qatar Germanııada Aıgúl Saılybaevanyń ólimine qatysty qylmystyq is tergelip jatyr. Germanııa quqyq qorǵaý organdary marqumnyń enesi Natalıa Dontsovaǵa 2024 jyly izdeý jarııalaǵan.
Aıta keteıik, Saryarqa aýdandyq sotynyń burynǵy sýdıasy, «Bolashaq» baǵdarlamasynyń túlegi Aıgúl Saılybaeva 2024 jyldyń maýsym aıynyń basynda Germanııanyń Benshaım qalasynda habar-osharsyz ketken.
4 maýsym kúni ol qyzyn balabaqshaǵa aparǵannan keıin onymen baılanys úzilgen. Sol kúni shamamen saǵat 14:30-da balany ájesi Natalıa Dontsova alyp ketken, odan keıin ol da kózden tasa bolǵan.
Birneshe aptadan soń Aıgúl Saılybaevanyń máıiti Benshaım qalasynyń shetinde polıetılen qaptyń ishinen tabyldy. Marqumnyń qoly, moıny jáne betinen pyshaq jaraqattary anyqtalǵan.
Sondaı-aq Aıgúl Saılybaeva joǵalǵan kúni onyń 49 jastaǵy enesi Natalıa Dontsovanyń da iz-túzsiz ketkeni belgili boldy. 4 maýsymda ol nemeresin balabaqshadan alyp, úıine jetkizgen. Sol ýaqyttan beri Natalıa Dontsovany kórgen jan joq.