QR SІM Iran ýranyn Qazaqstanda saqtaý bastamasyna pikir bildirdi
ASTANA. KAZINFORM — QR Syrtqy ister mınıstrligi Iran men AQSh arasynda ıadrolyq kelisim ornaǵan jaǵdaıda, Irannyń baıytylǵan ýranyn Qazaqstanda saqtaý bastamasy týraly MAGATE aqparatyna túsinikteme berdi.
Buǵan deıin MAGATE bas dırektory Rafael Grossı AQSh pen Iran arasynda kelisimge qol jetkizilgen jaǵdaıda, Irannyń baıytylǵan ýran qory Qazaqstanda saqtalýy múmkin ekenin málimdegen edi. Áńgime 60 paıyzǵa deıin baıytylǵan 440 keli ýran týraly bolyp otyr.
Rafael Grossıdiń aıtýynsha, bul usynysty oǵan osy aptada Memleket basshysy Qasym-Jomart Toqaev aıtqan.
QR SІM resmı ókili Erlan Jetibaevtyń túsindirýinshe, MAGATE habarlamasynda uıymnyń baqylaýyndaǵy Qazaqstandaǵy tómen baıytylǵan ýran banki meńzelgen.
— Bul jaǵdaıda MAGATE basshysy Qazaqstan aýmaǵynda ornalasqan, agenttikke tıesili tómen baıytylǵan ýran bankin de atap ótti. Atalǵan bank ıadrolyq qarýdy taratpaý jónindegi jahandyq rejımdi nyǵaıtýǵa mańyzdy úles qosyp, beıbit atom baǵdarlamalary úshin ıadrolyq otynnyń kepildendirilgen jetkizilimin qamtamasyz etetin qosymsha tetik bolyp otyr, — dedi resmı ókil vedomstvoda ótken brıfıngte.
Onyń aıtýynsha, Qazaqstan ıAdrolyq qarýdy taratpaý týraly sharttyń qatysýshysy ári ıadrolyq qarýy joq memleket retinde atom energııasyn tek beıbit maqsatta jáne MAGATE kepildikteri aıasynda paıdalanýdy qoldaıdy.
Sonymen birge, spıker Qazaqstannyń Irannyń ıadrolyq baǵdarlamasyna qatysty halyqaralyq kelissózder barysyn muqııat qadaǵalap otyrǵanyn jáne turaqtylyqty, qaýipsizdikti ári dıalogty nyǵaıtýǵa baǵyttalǵan kúsh-jigerdi qoldaıtynyn jetkizdi.
— Qazaqstan barlyq múddeli tarap arasynda tıisti halyqaralyq kelisimderge qol jetkizilip, másele praktıkalyq kezeńge ótken jaǵdaıda, ony sheshýge tehnıkalyq qoldaý kórsetýge daıyn ekenin bildirdi, — dedi Erlan Jetibaev.
Aıta keteıik, baıytylǵan ýran — atom elektr stantsııalarynyń jumysynda da, sondaı-aq ıadrolyq qarý jasaý úshin de (odan ári baıytylǵan jaǵdaıda) paıdalanylýy múmkin materıal.
Eske sala ketsek, 26 mamyrda Memleket basshysy Qasym-Jomart Toqaev Rafael Grossıdi qabyldap, Qazaqstan men MAGATE arasyndaǵy yntymaqtastyqty 2036 jylǵa deıin tereńdetý jónindegi Jol kartasynyń, sondaı-aq ıadrolyq medıtsına men ǵylym salasyndaǵy birqatar qujattyń qol qoıylýyn quptaǵan bolatyn.
