QR SІM HAMAS pen Izraıl arasyndaǵy qaqtyǵysqa qatysty málimdeme jasady
Qazaqstan HAMAS-tyń ızraıldik beıbit turǵyndarǵa shabýylyn jáne shetel azamattaryn kepilge alýyn aıyptaıdy. Bul týraly Qazaqstan Respýblıkasy Syrtqy ister mınıstrliginiń HAMAS pen Izraıl arasyndaǵy qarýly qaqtyǵysqa qatysty málimdemesinde aıtylǵan, dep habarlaıdy Kazinform.
«Qazaqstan HAMAS-tyń ızraıldik beıbit turǵyndarǵa shabýylyn jáne shetel azamattaryn kepilge alýyn aıyptaıdy. Biz BUU Bas hatshysy Antonıý Gýterrıshtiń kepilge alynǵan adamdardy aldyn ala shartsyz dereý bosatý jáne gýmanıtarlyq kómekke kedergisiz qoljetimdilikti qamtamasyz etý qajettiligi týraly úndeýin qoldaımyz.
Qazaqstan Respýblıkasynyń Prezıdenti Qasym-Jomart Toqaevtyń Bishkekte ótken TMD Sammıtindegi málimdemesinde kelesideı aıtyldy: «Ondaǵan jyldar boıy sheshimin tappaı kele jatqan mindetterdi júzege asyrý úshin terrorıstik áreketterdi jasaýǵa bolmaıdy. Bul áreketter aqtaýǵa jatpaıdy» delingen málimdemede.
Sondaı-aq, Qazaqstan Izraıldi Gaza sektorynda kóptegen beıbit turǵyndardyń qaza bolýyna jáne azamattyq ınfraqurylymnyń joıylýyna ákelip soǵatyn proportsıonaldy emes kúsh qoldanýdan bas tartýǵa shaqyrady.
Mundaı jaǵdaıda halyqaralyq quqyq normalaryn saqtaı otyryp, Palestına halqynyń zańdy quqyqtaryn kózdeıtin BUU Qaýipsizdik Keńesiniń tıisti qararlaryn oryndaý óte mańyzdy. Zorlyq-zombylyq áreketi qaıta zorlyq-zombylyqty týdyrady jáne Taıaý Shyǵys pen búkil álem úshin sózsiz qaıǵyly saldarǵa alyp keledi.
"Qazaqstan Gaza sektorynyń turǵyndaryn evakýatsııalaý úshin belgilengen merzimderdi alyp tastaý jáne qaqtyǵystyń kepilderine aınalmaýy tıis beıbit turǵyndardyń tolyq qaýipsizdigin qamtamasyz etýdi talap etken halyqaralyq qoǵamdastyqpen nıettestik bildiredi.
Osyǵan baılanysty Qazaqstan taraptardy áskerı áreketterdi tez arada toqtatýyn qamtamasyz etýge jáne «eki halyq úshin eki memleket» formýlasy negizinde aımaqtyń barlyq turǵyndary úshin beıbitshilik, turaqtylyq pen qaýipsizdikke qol jetkizý jónindegi kúsh-jigerdi jandandyrýǵa shaqyrady" dep jazylǵan málimdeme mátininde.
