QR SІM eskertý jasady: Taıaý Shyǵysqa saparlaýǵa áli de árekettenip jatqan adamdar bar

ASTANA. KAZINFORM — QR Syrtqy ister mınıstrliginiń resmı ókili Erlan Jetibaev Taıaý Shyǵystaǵy jaǵdaıǵa baılanysty Qazaqstan azamattaryna arnalǵan tıisti nusqaýlyqty jarııalady. 

Onyń aıtýynsha, Taıaý Shyǵystaǵy áskerı is-qımyldardyń jalǵasýyna, sondaı-aq kóptegen eldiń áýe keńistiginiń jabylýyna baılanysty Qazaqstan Syrtqy ister mınıstrligi atalǵan óńirde belsendi áskerı is-qımyldar toqtaǵansha birqatar memleketke saparlaýdan bas tartýǵa shaqyrdy.

— Bahreın, Mysyr, Izraıl, Iemen, Iordanııa, Irak, Iran, Qatar, Saýd Arabııasy, Kýveıt, Lıvan, Birikke Arab Ámirlikteri, Oman jáne Sırııaǵa barýdan bas tartýǵa shaqyramyz. Osy óńirde júrgen Qazaqstan azamattaryn jeke qaýipsizdik sharalaryn kúsheıtýge, qaýipti aýdandarǵa barmaýǵa, jergilikti bılik organdarynyń nusqaýlaryn oryndaýǵa, zymyran qulaýy qaýpi bolǵan jaǵdaıda panalaý oryndaryna barýǵa, sondaı-aq Qazaqstannyń sheteldegi mekemelerimen jáne týroperatorlarmen, áýe tasymaldaýshylarmen turaqty baılanysta bolýyna shaqyramyz, — dedi Erlan Jetibaev mınıstrliktegi baspasóz máslıhatynda.

Onyń sózine qaraǵanda, buǵan deıingi eskertýlerge qaramastan, keıbir adamdar atalǵan óńirdegi elderge saparlaýǵa árekettenip jatyr.

— Jaǵdaı tolyq turaqtanǵanǵa deıin mundaı saparlardy josparlaýdan bas tartý kerek, — dedi resmı ókil.

Budan buryn habarlanǵandaı, aldaǵy kúnderi Taıaý Shyǵystan qansha adam elge jetkiziletini málim boldy.