QR Syrtqy ister mınıstriniń Máskeýge resmı sapary bastaldy
MÁSKEÝ. KAZINFORM — Elimizdiń Syrtqy ister mınıstri Ermek Kósherbaevtyń Reseı Federatsııasyna resmı sapary bastaldy. Buǵan deıin E. Kósherbaev úsh jyldan astam ýaqyt Qazaqstannyń Reseıdegi elshisi bolǵan edi. Al búgin Máskeýge jańa laýazymda RF Syrtqy ister mınıstri Sergeı Lavrovtyń arnaıy shaqyrýymen alǵashqy resmı saparymen keldi.
Eń aldymen qazaqstandyq mınıstr Qyzyl alańdaǵy Aleksandr saıabaǵynda belgisiz sarbaz qabirine gúl shoǵyn qoıdy. Bıyl — ekinshi dúnıejúzilik soǵystyń aıaqtalǵanyna 80 jyl.
Mereıli jyldar men ataýly kúnder legi munymen aıaqtalmaıdy, dál búgin — 22 qazanda Qazaqstan men Reseıdiń dıplomatııalyq qarym qatynas ornatqanyna 33 jyl tolyp otyr.
QR SІM habarlaýynsha, búgin Ermek Kósherbaev Reseıdiń Syrtqy ister mınıstri Sergeı Lavrovpen kezdesýi josparlanǵan. Sondaı-aq keńeıtilgen ekijaqty kezdesýde yntymaqtastyqtyń ózekti máseleleri talqylanady.
Aıta keteıik, 2024 jyly Qazaqstan men Reseı arasyndaǵy taýar aınalymy $28 mlrd-qa jetip, ótken jyldyń sáıkes kezeńinee 3%-ǵa ulǵaıǵan edi.
Qazaqstannyń syrtqy saýda aınalymyndaǵy Reseıdiń úlesi 20%-ǵa jetip, 2023 jylǵy kórsetkishten 19% asyp tústi. Bul rette Reseıdiń Qazaqstan ımportyndaǵy úlesi 28%-dan 31%-ǵa deıin ósti.
Al bıyl Qazaqstan men Reseıdiń birlesken bastamalar portfelinde 171 joba bar, olardyń jalpy somasy 53 mlrd dollardan asady. Bul kórsetkish 2019 jyly qol qoıylǵan Ónerkásiptik yntymaqtastyqtyń jol kartasynda belgilengen bastapqy josparlardan alty ese kóp.
Eske sala ketsek, Prezıdent Qasym Jomart Toqaev 12 qarasha Reseıge memlekettik saparmen barady.
Aıta keteıik, RF Syrtqy ister mınıstrligi Qazaqstan-Reseı shekarasyndaǵy jaǵdaıǵa túsinik berdi.
