Kósherbaev Eýropalyq komıssııanyń vıtse-prezıdentimen telefon arqyly sóılesti
ASTANA. KAZINFORM — Qazaqstan Respýblıkasynyń Syrtqy ister mınıstri Ermek Kósherbaev Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili — Eýropalyq komıssııanyń vıtse-prezıdenti Kaıa Kallaspen telefon arqyly sóılesti.
Vedomstvonyń habarlaýynsha, Qazaqstan Respýblıkasynyń Prezıdenti Qasym-Jomart Toqaevtyń 2026 jylǵy 23 maýsymda Brıýsselge jasaǵan saparynyń qorytyndysy boıynsha qol jetkizilgen ýaǵdalastyqtardy talqylaý aıasynda taraptar ekijaqty kún tártibindegi ózekti máselelerdi, saýda-ekonomıkalyq baılanystardy keńeıtý, yntymaqtastyqtyń perspektıvaly baǵyttaryn, sondaı-aq aldaǵy ekijaqty jáne kópjaqty baılanystardyń kestesin talqylady.
— Suhbattasýshylar energetıka salasyndaǵy ózara is-qımyl máselelerine jáne energııa resýrstaryn jetkizýdiń halyqaralyq ınfraqurylymyn, onyń ishinde Kaspıı qubyr konsortsıýmy sheńberindegi ınfraqurylymdy odan ári damytý perspektıvalaryna erekshe nazar aýdardy, — delingen habarlamada.
Áńgime barysynda taraptar seriktestikti odan ári nyǵaıtýǵa múddeliligin rastap, perspektıvaly yntymaqtastyq baǵyttaryn keńeıtýge ózara beıildiligin bildirdi.
Eske salaıyq, buǵan deıin Ermek Kósherbaev Ortalyq Azııa elderi men Ázerbaıjannyń syrtqy ister mınıstrlerimen telefon arqyly sóıleskenin habarlaǵanbyz.
