QR sınoptıkteri maýsym aıynda sýyqtyqtyń úsh tolqynyn boljap otyr
ASTANA. QazAqparat - 2016 jyldyń maýsym aıynda Qazaqstanda jyly kúnderge ulasatyn sýyqtyqtyń úsh tolqyny kútilip otyr.
Eldiń kóptegen bóliginde jaýyn-shashynnyń kóp mólsherde túsýi kútilýde, tek Mańǵystaý oblysynda, Aqtóbe, Qyzylorda oblystarynyń basym bóliginde jáne Qaraǵandy oblysynyń batysynda normataǵydan azyraq bolmaq.
«Bir aıdyń ishinde jyly kúnderge ulasatyn sýyqtyqtyń úsh tolqyny kútilip otyr. Aıdyń basynda salqyn ári ylǵaldy aýa massasyna toly tsıklon jaýyn-shashyndy salqyn kún raıyn soqtyrady, eldiń soltústiginde aýanyń temperatýrasy 1-6 gradýs jylylyqty kórsetse, aımaqtyń jekelegen aımaqtarynda 2 gradýsqa deıin sýyq bolady», - delingen «Qazgıdromettiń» boljamynda.
Eldiń batysy men ońtústiginde ótkinshi naızaǵaıly jańbyrlardan túnde aýanyń temperatýrasy 7-12 gradýs, kúndiz 12-20 gradýsqa deıingi jylylyqty kórsetedi. Ońtústikte túnde 10-18 gradýs jyly bolsa, kúndiz 27-35 gradýs ystyq bolady. Odan keıin Orta Azııadan jyly aýa massalarynyń aǵynymen birge kúndizgi aýa temperatýrasynyń kóterilýi kútilip otyr: Qazaqstannyń soltústik bóliginde kúndiz 23-31 gradýs, ońtústik aımaqtarda - kúndiz 33-40 gradýs ystyq bolady.
«Sýyq túsýdiń kezekti eki tolqynyn aıdyń ortasynda jáne sońynda kútýge bolady, qalǵan kúnderi kóbine jyly kún raıy boljanyp otyr. Kúndizgi ýaqytta elimizdiń soltústiginde aýanyń temperatýrasy 34 gradýsqa deıin, al ońtústikte - 40 gradýsqa deıin kóteriledi», - dep habarlady sınoptıkter.
