QR SІM: Japonııadaǵy jer silkinisinen zardap shekkender arasynda Qazaqstan azamattary joq
ASTANA. QazAqparat - Japonııadaǵy jer silkinisinen zardap shekkender arasynda qazaqstandyqtar týraly aqparat túsken joq. Bul týraly QR Syrtqy ister mınıstrliginen habarlady.
«Zardap shekkender arasynda bizdiń azamattar týraly málimetter kelip túsken joq», - dedi QR SІM baspasóz qyzmetiniń jetekshisi Ánýar Jaınaqov.
Aıta keteıik, Japonııanyń Kıýsıý aralyndaǵy Kýmamoto qalasynda magnıtýdasy 7,3 bolatyn jer silkinisinen qaza tapqandar sany 11 adamǵa jetti. Taǵy 760 adam aýrýhanada jatyr. Japon meteorologııalyq agenttigi osyǵan deıin turǵyndardy jer silkinisi saldarynan tsýnamı bolýy múmkin ekenin eskertip, jaǵalaý mańynan qonys aýdarýdy suraǵan bolatyn.
Jalpy, Japonııada eki kún ishinde eki birdeı jer silkinisi oryn aldy. Kýmamotonyń Ýekı qalasynan 7 shaqyrym qashyqtyqta magnıtýdasy 6,2 bolatyn jer silkinisi bolyp, saldarynan 9 adam qaza tapqan edi. Sondaı-aq myńǵa jýyq adam zardap shekken.
