QR SІM jáne DDSU basshylary alǵashqy kómek jónindegi Astana deklaratsııasyn talqylady
ASTANA. QazAqparat - Syrtqy ister mınıstri Qaırat Ábdirahmanov pen Dúnıejúzilik densaýlyq saqtaý uıymynyń Bas dırektory Tedros Gebreıesýs Astanada ótken Medıtsınalyq-sanıtarlyq alǵashqy kómek jónindegi jahandyq konferentsııanyń qorytyndylaryn talqylady. Bul týraly QR SІM baspasóz qyzmetine silteme jasap QazAqparat habarlaıdy.
Halyqaralyq qoǵamdastyq osyndaı bedeldi álemdik forýmdy uıymdastyrýǵa, densaýlyq saqtaý júıesine qoldaý kórsetýge jeke nazar aýdarǵany úshin Prezıdent Nursultan Nazarbaevqa rızashylyǵyn bildirip, is-sharanyń QR Úkimeti men Densaýlyq saqtaý mınıstrligi tarapynan jaqsy uıymdastyrylǵanyn aıtyp jatyr.
Kezdesý barysynda taraptar 25 qazanda forým qatysýshylary biraýyzdan qabyldaǵan Astana deklaratsııasynyń mańyzyn atap ótti. Qujat sapaly jáne ýaqytyly medıtsınalyq kómek kórsetýdi qamtamasyz etetin zamanaýı jetistikter men tehnologııalardy qoldanýdy eskere otyryp, 1978 jylǵy Almaty deklaratsııasynyń mindettemelerin oryndaýda aınymastyǵyn kórsetedi. 40 jyl buryn Almatyda qabyldanǵan bul qujat alǵashqy medıtsınalyq-sanıtarlyq kómekke nazar aýdara otyryp, álemdegi densaýlyq saqtaý júıesin túpkilikti damytýǵa negiz qalaǵan.
T. Gebreıesýs Qazaqstannyń jahandyq deńgeıde alǵashqy medıtsınalyq-sanıtarlyq kómekti damytýǵa qosqan úlesin atap ótti. Kezdesý barysynda taraptar 2019 jyldyń mamyrynda Jenevada Dúnıejúzilik densaýlyq saqtaý assambleıasynyń DDSU-nyń Astana deklaratsııasy negizinde qabyldanatyn qararynyń perspektıvasyn talqylady. Sonymen qatar, 2019 jyldyń qyrkúıeginde Nıý-Iorkte Dúnıejúzilik densaýlyq saqtaýdy qamtý jónindegi BUU Bas Assambleıasynyń Joǵary deńgeıdegi kezdesý rezolıýtsııasyn usyný josparlanyp otyr.
