QR SІM Vengrııa halqyna Italııadaǵy kólik apatyna baılanysty kóńil aıtty
ASTANA. QazAqparat - QR Syrtqy ister mınıstrligi Vengrııa halqyna Italııada bolǵan iri jol apaty kezinde balalardyń qurban bolýyna baılanysty kóńil aıtty, dep habarlaıdy QazAqparat.
«Vengrııa halqyna Verona qalasyndaǵy jol apatynda balalardyń qurban bolýyna baılanysty shyn nıetpen kóńil aıtamyz jáne zardap shekkenderdiń jyldam saýyǵyp ketýlerin tileımiz»,-delingen elimizdiń syrtqy ister vedomstvosynyń áleýmettik jelidegi akkaýntynda.
Aıta keteıik, Italııada avtobýstyń apatqa ushyraýyna baılanysty 16 adam qurban bolyp, 26 adam aýrýhanaǵa jetkizildi.
Italııanyń quqyq qorǵaý organy ókilderiniń málimetterinshe, týrısterge arnalǵan avtobýs Frantsııadan Vengrııaǵa kele jatqan. Onda barlyǵy 55 adam bolǵan. Jolaýshylardyń deni muǵalimder, oqýshylar men ata-analar bolatyn, dep jazady Rıa Novostı.
Qaıǵyly jaǵdaı juma kúni túnde Verona qalasynda boldy. Qutqarýshylardyń málimetterinshe, avtobýs baǵanaǵa soǵylyp artynan órt shyqqan. Avtobýstyń júrgizýshisi, Frantsııa azamaty mert bolǵandardyń bireýi bolýy múmkin.
