QR SІM Úndistanda qalyp qoıǵan qazaqstandyqtarǵa qatysty túsinik berdi
ASTANA. QazAqparat - QR Syrtqy ister mınıstrliginde Úndistanda qalyp qoıǵan qazaqstandyqtarǵa qatysty túsinik berdi, dep habarlaıdy QazAqparat tilshisi.
«28 aqpanda, 1-2 naýryzda ushaqpen jete almaǵan barlyq Qazaqstan azamattary elge oraldy. «Eır Astana» búginnen bastap reısterdi shtattyq rejimde jalǵastyrýda. Eger de qandaı da bir kútpegen jaǵdaı bolsa, onda jedel shtab jumys istep turǵan elshilikke dereý habarlasýdy suraımyz», - dedi QR SІM resmı ókili Aıbek Smadııarov Parlament Májilisinde tilshiler saýalyna jaýap bere otyryp.
Onyń sózine qaraǵanda, búginde ushaqtar Úndistan astanasynan Almaty men Astanaǵa áýe saparlaryn jalǵastyrýda.
«Keshe reıster boldy, búginge taǵy reıs bar. Bizdiń azamattar keste boıynsha saparlap jatyr. BAQ-ta 300-den astam jolaýshy týraly aqparat taraǵan edi, alaıda onyń ishinde tek 68-i Qazaqstan azamaty», - dedi resmı ókil.
Eske sala ketsek, Pákistan Respýblıkasy áýe keńistiginiń búkil halyqaralyq áýe baǵyttaryna jabyqtyǵyna baılanysty «Eır Astana» áýe kompanııasynyń Delı - Almaty baǵytyndaǵy 27 aqpanǵa josparlanǵan reısi keıinge qaldyrylǵan bolatyn.
Buǵan deıin QR SІM Úndistan men Pákistan arasyndaǵy áskerı-saıası jaǵdaıdyń shıelenisýine baılanysty málimdeme jasaǵandyǵyn jazdyq.
