QR SІM Ýkraınanyń shyǵysynda «Boıng» ushaǵynyń apatqa ushyraýyna alańdaýshylyq tanytady

ASTANA. QazAqparat - Qazaqstan Ýkraınanyń shyǵysynda «Boıng» ushaǵynyń apatqa ushyraýyna alańdaýshylyq tanytady. Bul týraly búgin QR Syrtqy ister mınıstrliginiń resmı ókili Nurjan Aıtmahanov málim etti.

«Malaızııa áýejoldary ushaǵynyń Ýkraına shyǵysynda apatqa ushyraýy saldarynan qaza tapqandardyń týystary men jaqyndaryna aza tutyp, kóńil aıtamyz. Bolǵan oqıǵaǵa asa alańdaýshylyq tanytamyz. Aldyn ala aqparatqa sáıkes, ushaqta Qazaqstan Respýblıkasynyń azamattary bolmaǵan. Bul máseleni biz ary qaraı anyqtaýdamyz jáne qosymsha resmı aqparattar kelip túsken jaǵdaıda, sizderdi habardar etetin bolamyz», - dedi ol.