QR SІM: Ýkraınadaǵy taǵy 600 Qazaqstan azamaty evakýatsııalaýǵa ótinish berdi

NUR-SULTAN. QazAqparat – Ýkraınadan otanǵa oralǵysy keletin qazaqstandyqtardyń sany kún sanap artyp jatyr. Bul týraly Qazaqstannyń Ýkraınadaǵy elshisiniń keńesshisi Sergeı Konovalov málim etti, dep habarlaıdy QazAqparat tilshisi.

«Jýyrda ǵana 600 adam evakýatsııalaýǵa ótinish berdi. Osylaısha bizdiń konsýldyqtyń esebinde 1,5 myń adam tur. Qazaqstannyń Ýkraınadaǵy elshiligi istiń sońyna deıin bolady. Ázirge múmkindik bar kezde azamattarymyzdy atalǵan elden evakýatsııalaıtyn bolamyz», - dedi Sergeı Konovalov tilshilerge bergen suhbatynda.

Sondaı-aq, elshilik ókili Ýkraınada kólikpen adam tasý qunynyń birneshe esege ósip ketkenin jetkizdi.

«Kólik baǵasy qazir óte qymbat. Ýkraınanyń Lvov qalasyna deıin jáne Jáne Polsha shekarasynda avtobýstyń quny 10-15 myń dollarǵa deıin jetedi. Sondyqtan qazir elshilikti qamtamasyz etý jáne evakýatsııany jalǵastyrý úshin qosymsha qarjylandyrý máselesi sheshilip jatyr. Qazaqstan azamattaryn búginge deıin evakýatsııalaý protsesi búginge deıin birneshe adamnyń ortaq eńbegi», - deıdi ol.

Buǵan deıin habarlaǵanymyzdaı, Ýkraınadaǵy Qazaqstan azamattarynyń ekinshi legi elordaǵa keldi.

Olar Polshanyń Katovıtse qalasynan Atyraýǵa, odan ári el astanasyna jetti. Bortta 120 eresek adam jáne 4 bala bar.

Elge aman saý jetken otandastarymyzdy elorda jurty qýanyshpen qarsy aldy.

Aıta keteıik, elimizdiń syrtqy ister mınıstrligi qazaqstandyq azamattardy Ýkraınadan otanyna qaıtarý jumysyn jalǵastyryp jatyr.