QR SІM Túrkııadaǵy lańkestik boıynsha qorytyndy aqparatty málim etti
ASTANA. QazAqparat - Jańa jyl túni Ystanbuldaǵy túngi klýbta bolǵan shabýyldan Qazaqstan azamattary zardap shekken joq. Bul týraly QazAqparat tilshisine QR SІM baspasóz qyzmetiniń basshysy Ánýar Jaınaqov telefon arqyly habarlady.
«Túrkııalyq taraptyń habarlaýynsha, Ystanbuldaǵy terakt saldarynan qazaqstandyqtar zardap shekken joq. Bul naqty rastalǵan aqparat», - dedi Ánýar Jaınaqov.
Budan buryn «QazAqparat» HAA málim etkendeı, Ystanbuldaǵy Reina túngi klýbyna jasalǵan shabýyl saldarynan 35 adam qaza taýyp, jaralanǵandar sany 40-qa jetti. Bul týraly Ystanbulda júrgen otandasymyz Nurat Ilııas jergilikti bılik málimetterine silteme jasap habarlady.
Santa Klaýs kostıýmin kıgen eki er adam "Reına" túngi klýbyna basyp kirip, beıbereket oq atqan. Olar shabýyl jasaǵan kezde ǵımarattyń ishinde 700-800 adam bolǵan.
«2017 jyl Túrkııanyń iri qalasynda terrorlyq aktimen bastaldy. Salafıtter túngi klýbqa kirip avtomattan jappaı oq ata bastady. Olardyń pikirinshe, Jańa jyldy merekeleý - bul haram. Jáne mundaı paıymdaý áleýmettik jelide taralǵan»,-dep jazdy Nurat Ilııas Facebook-te. Ol Ystanbul ýnıversıtetinde «tıýrkologııa» mamandyǵy boıynsha doktorantýrada oqıdy. Úsh jyldan beri osy qalada turady.
Ystanbul túngi klýbynda oq atqan lańkesterdiń biriniń kózi joıyldy, dep habarlady Guardian.
