QR SІM Sırııaǵa baılanysty Astanada ótkizilýi yqtımal kelissózderdiń jaı-japsaryn naqtylady
- ASTANA. QazAqparat - Qazaqstan Respýblıkasy Syrtqy ister mınıstrligi Sırııaǵa baılanysty Astanada ótkizilýi yqtımal kelissózderdiń jaı-japsaryn naqtylady. QR Syrtqy saıası vedomostvosynyń málimdemesinde kelissózderdi ótkizý tek atysty doǵarý rejımin josparly túrde saqtaý jaǵdaıynda ǵana múmkin bolatyny aıtylady. Málimdeme vedomostvonyń saıtynda jarııalandy.
«Sırııa Arab Respýblıkasynyń barlyq aýmaǵyndaǵy atysty doǵarý jáne úkimet pen qarýly oppozıtsııanyń Reseı Federatsııasy men Túrkııa Respýblıkasy kepilgerler bolyp shyǵatyn beıbit kelissózderdi bastaýǵa ázirligi týraly ýaǵdalastyqtardy quptaımyz.
«Sırııa úkimeti men qarýly oppozıtsııa arasyndaǵy atysty doǵarý týraly», «Atysty doǵarý rejımine baqylaý jónindegi sharalar kesheni týraly», «Sırııalyq retteý jónindegi beıbit kelissózderdi bastaýǵa ázirlik týraly» úsh qujatqa qol qoıylýy sırııalyq daǵdarysty sheshý jónindegi is júzindegi áreketter úshin shynaıy negiz bolýǵa qabiletti dep sanaımyz.
Jospardy Birikken Ulttar Uıymy jáne Arab Memleketteri Lıgasynyń arnaıy ókili Staffan de Mıstýra men Sırııada urys áreketteriniń tezirek doǵarylýyna múddeli basqa taraptar qoldaǵany mańyzdy.
Osyǵan baılanysty tıisti kelissózderdi Astanada ótkizýge Qazaqstan Prezıdenti Nursultan Nazarbaevtyń jarııa etken ázirligimizdi rastaımyz. Kelissózderdi ótkizý tek atysty doǵarý rejımin josparly túrde saqtaý jaǵdaıynda ǵana múmkin bolatynyn túsinemiz.
Sońǵy ýaǵdalastyqtardyń Sırııadaǵy tolyqqandy saıası úderisti BUU Qaýipsizdik Keńesiniń 2254 (2015) qararyna sáıkes qaıta jańǵyrtýǵa múmkindik beretinine senemiz.
Qazaqstan ári qaraı da halyqaralyq qaýymdastyqtyń tıisti kúsh-jigerlerine, sonyń ishinde 2017 jyldyń 1 qańtarynan 2018 jyldyń 31 jeltoqsany aralyǵynda BUU Qaýipsizdik Keńesiniń turaqty emes múshesi retinde yqpal etýge ázir»,-delingen QR SІM málimdemesinde.
