QR SІM: Shet elderdegi daýys berý nátıjesi 48 saǵattyń ishinde elordaǵa jetkiziledi
ASTANA. QazAqparat - Shet elderdegi daýys berýdiń qorytyndysy týraly hattama 48 saǵattyń ishinde Astana qalasy Esil aýdandyq saılaý komıssııasyna tabys etiledi.
Bul týraly búgin QR Ortalyq saılaý komıssııasynda ótken brıfıngte QR Syrtqy ister mınıstrligi Ákimshilik jáne baqylaý departamentiniń dırektory Qaırat Sarjanov málim etti.
Onyń atap ótýinshe, shet eldegi saılaý ýchaskeleri de jergilikti ýaqyt boıynsha tańǵy 7-00-den keshki 20-00-de deıin jumys isteýde. Ýaqyt aıyrmashylyǵyna baılanysty astana ýaqyty boıynsha 3-te Tokıodaǵy jáne Seýldegi saılaý ýchaskeleri eń birinshi bolyp ashyldy. 16-00-de eń sońǵy bolyp Vashıngton, Nıý-Iork jáne Ottavadaǵy saılaý ýchaskeleri jumysqa kirisken.
«Tokıo men Seýldegi saılaý ýchaskeleri astana ýaqyty boıynsha saǵat17-00-de óz jumysyn aıaqtady. 18-00-de Beıjiń, Shanhaı, Gonkong, Úrimshi, Kýala-Lýmpýr, Sıngapýr, Ulan-Batyrdaǵy saılaý ýchaskeleri de jabyldy», - dedi ol.
Q.Sarjanovtyń atap ótýinshe, qazirgi ýaqytta shet eldegi 56 saılaý ýchaskesi jumys istep tur.
«Eń sońǵy bolyp AQSh pen Kanadaǵy saılaý ýchaskeleri 27 sáýir kúni tańerteńgi 6-da jabylady. Shet elderdegi daýys berýdiń qorytyndysy týraly hattama 48 saǵattyń ishinde Esil aýdandyq saılaý komıssııasyna tabys etiledi», - dedi departament dırektory.
