QR SІM shekarada Qazaqstan azamatyn óltirý oqıǵasyna qatysty Ózbekstanǵa narazylyq notasyn joldamaq
ASTANA. QazAqparat - QR Syrtqy ister mınıstrligi ózbek shekarashylarynyń Qazaqstan azamatyn atyp tastaýyna qatysty málimdeme jasady.
"28 maýsym kúni Ýálıhan Ahmetov oqqa ushty. Ol 1978 jyly týǵan, OQO Saryaǵash aýdany Qyzyl Ásker aýylynyń turǵyny. Osy oraıda, QR SIM Ýálıhan Ahmetovtiń qazasyna baılanysty týǵan-týystaryna, jaqyndaryna kóńil aıtady. Bul oqıǵaǵa Qazaqstan tarapy narazylyq bildiredi. Beıbit kúnde Qazaqstan azamattaryna qarý qoldaný Qazaqstan men Ózbekstan arasyndaǵy áriptestik, baýyrlastyq, strategııalyq qarym-qatynastarǵa qaıshy keletindigin atap ótemiz. Biz atalmysh oqıǵanyń egjeı-tegjeıli ári jan-jaqty tergeýdi talap etemiz. Sebebi Ózbekstan shekarasyn kesip ótýi múmkin Qazaqstan azamattaryna qarý qoldaný qısynsyz shara dep esepteımiz. Biz bul oqıǵanyń muqııat tergelýin talap etemiz. Tolyq aqparat usynylyp, kináliler jazalanýy tıis. Qazaqstan Syrtqy ister mınıstrligi narazylyq notasyn daıyndady", - dedi QR SIM resmı ókili Altaı Ábıbýllaev.
Resmı ókildiń atap ótkenindeı, notany tabystaý úshin Qazaqstandaǵy Ózbekstan elshisi mınıstrlikke shaqyrtyldy. Onyń sózine qaraǵanda, zardap shekken tarapqa Qazaqstan zańdaryna sáıkes kómek kórsetiledi.
Aıta keteıik, Ońtústik Qazaqstan oblysynyń Ózbekstanmen shekaralas aımaǵynda ózbek áskerıleri Qazaqstan azamatyn atyp tastaǵan bolatyn.
Qaıǵyly oqıǵa 28 maýsym kúni keshki saǵat 21-50 shamasynda bolǵan. Qazaqstannyń eki azamaty Syrdarııa ózeninde balyq aýlaǵan. Ózbek shekarashylary olarǵa on ret oq atqan. Sonyń ekeýi 36 jastaǵy Ýálıhan Ahmetovke tıgen. Ekinshi balyqshy aman.
Marqumnyń artynda 7 balasy qaldy.
