QR SІM: Saýd Arabııasy men Iran arasyndaǵy qatynastardyń shıelenisýi álem elderiniń qaýipsizdigi men turaqtylyǵyna teris yqpal etedi

Jıdda qalasynda Islam Yntymaqtastyq Uıymynyń Syrtqy ister mınıstrleri keńesiniń tótenshe otyrysyna qatysqan QR Syrtqy ister mınıstriniń orynbasary Asqar Mýsınov osylaı dep málimdedi. Bul týraly atalǵan vedomstvonyń baspasóz qyzmetinen habarlady.

Mınıstrliktiń habarlaýynsha, Saýd Arabııa bastamalyq etken osy mınıstrler kezdesýiniń basty taqyryby Tegerandaǵy Saýd Arabııasy Koroldigi Elshiliginiń jáne Meshhedtegi Bas konsýldyǵynyń shabýylǵa ushyraýyna baılanysty jaǵdaıdy talqylaý boldy.

A. Mýsınov óz sózinde óńirdegi eki jetekshi memleketter - Saýd Arabııasy men Iran arasyndaǵy qatynastardyń shıelenisýi tek Taıaý Shyǵys, Afrıka, Ortalyq Azııanyń ǵana emes, sondaı-aq basqa memleketterdiń qaýipsizdigi men turaqtylyǵyna yqpal etetinin atap ótti. Qaqtyǵysýshy taraptardy, sonymen qatar basqa da memleketterdi konfessııaaralyq shıelenistiń ári qaraı órship ketpeýi úshin tıisti sharalar qabyldaýǵa, memleketter arasynda kelisimdi qamtamasyz etý men dıplomatııalyq qatynastardy qaıta qalpyna keltirý úshin saıası dıalog ornatýǵa jáne elder arasynda kelissózder júrgizýge shaqyrdy.

Osy oraıda qazaqstandyq dıplomat sheteldik dıplomatııalyq ókildikterge shabýyl jasaýǵa jol berilmeýi tıis ekenin, al akkredıtteýshi elder Dıplomatııalyq qatynastar týraly Vena konventsııasyna sáıkes olardyń qaýipsizdigin qamtamasyz etýge mindetti ekenin atap ótti.

Terrorızm men ekstremızmge qarsy kúresti kúsheıtý qajettiligin aıta otyryp, A. Mýsınov kezdesýge qatysýshylardy ótken jyly qyrkúıek aıynda BUU Bas Assambleıasynyń minberinen jarııalanǵan, BUU-nyń qoldaýymen halyqaralyq terrorızm men ekstremızmge qarsy tura alatyn biryńǵaı álemdik jeli qurý, sonymen qatar BUU-nyń terrorızmmen kúres jónindegi máseleni tutastaı qamtıtyn qujatyn ázirleý jáne ony qabyldaý týraly QR Prezıdenti Nursultan Nazarbevtyń bastamasyn qoldaýǵa shaqyrdy.