QR SІM resmı ókili Kaspıı teńizinde ýlanyp qalǵan ırandyqtarǵa qatysty pikir bildirdi
ASTANA. QazAqparat - Iran tarapy Kaspıı teńizinde úsh ıran teńizshisiniń ýlanyp qalý jaǵdaıyna qatysty Qazaqstannyń Syrtqy ister mınıstrligine habarlasqan joq. Ol jaıly QR SІM-de ótken baspassóz máslıhatynda vedomstvonyń resmı ókili Aıbek Smadııarov aıtty, dep habarlaıdy QazAqparat tilshisi.
«Irandyq teńizshiler týraly: Qazaqstannyń Syrtqy ister mınıstrligi Kaspıı teńizinde ırandyq júk kemesindegi teńizshilerdiń ýlaný jaǵdaıyn baqylap otyr. Keme Aqtaý-Baký baǵdary boıynsha kele jatqan. QR Aýyl sharýashylyǵy mınıstrliginiń Mańǵystaý oblysyndaǵy aýmaqtyq ınspektsııasy oqıǵanyń mán-jaıyn jáne ýlaný sebebin anyqtap jatyr. Inspektsııa jumysy júrgizilgennen keıin naqty aqparat jarııalanatyn bolady», - dedi Aıbek Smadııarov.
Sonymen birge, QR SІM ókili Iran tarapy Kaspıı teńizinde úsh ıran teńizshisiniń ýlanyp qalý jaǵdaıyna qatysty Qazaqstannyń Syrtqy ister mınıstrligine habarlaspaǵanyn aıtyp ótti.
«Juma kúni ázerbaıjandyq shekarashylar teńizshilerdiń jappaı ýlanýyna qatysty kómek suraǵan ırandyq «Nazmehr» júk tasymaly ekıpajynyń múshelerin qutqaryp aldy. Ýlanǵandardyń úsheýi kóz jumǵan», - deıdi ol.
Aıta ketsek, buǵan deıin birqatar BAQ-ta Kaspıı teńizinde ırandyq teńizshilerdiń ýlanǵany týraly jazylǵan bolatyn. QR SІM atalmysh jaǵdaıdan ırandyq úsh teńizshiniń qaıtys bolyp, taǵy on biri zardap shekkenin rastap otyr.
QR Syrtqy ister mınıstrligi osyǵan deıin Ońtústik Koreıada 12 myńǵa tarta qazaqsandyq zańsyz júrgendigin habarlady.
