QR SІM: Polshaǵa jetken qazaqstandyqtardyń alǵashqy legi elge búgin ushady

NUR-SULTAN. QazAqparat – 80 Qazaqstan azamaty Ýkraına shekarasynan ótip Polshaǵa jetkizildi. Endi olardy elge jetkizý máselesi qaralyp jatyr. Osy oraıda alǵashqy reıstiń qashan bolatyny aıtyldy, dep habarlaıdy QazAqparat tilshisi QR Syrtqy ister mınıstrliginiń baspasóz qyzmetine silteme jasap.

«Alǵashqy repatrıatsııalyq reıs 27 aqpanda QR azamattarynyń negizgi bóligi Katovıtse qalasyna (Polsha) kelgennen keıin júzege asyrylady dep kútilýde. Aldaǵy ýaqytta basqa da repatrıatsııalyq reıster uıymdastyrý josparlanǵan. Osyǵan baılanysty Ýkraınanyń ártúrli qalalaryndaǵy qazaqstandyqtardan Qazaqstan Respýblıkasynyń Kıevtegi Elshiligine habarlasýdy jáne óziniń ornalasqan jeri týraly habarlaýdy suraımyz. Múmkindik bolǵan jaǵdaıda, Polsha shekarasyna deıin uıymdasqan túrde jetý úshin Lvov nemese Kıev qalalaryna óz kúshimen barýdy usynamyz», - degen habar taratty QR SІM.

Mınıstrliktiń habarlaýynsha, Qazaqstan azamattaryna qajetti kómektiń barlyǵy kórsetiledi.

«Jol-kólik jaǵdaıynyń kúrdeli bolýyna jáne Ýkraınadaǵy áskerı áreketterdiń jalǵasýyna baılanysty bul qıyndyq týdyrý múmkin. Mundaı jaǵdaıda ózderińiz ornalasqan mekenderińizde qalýdy, QR Elshiligimen jáne qurmetti konsýldyqtarymen únemi baılanysta bolýdy suraımyz. Jaǵdaı anyqtalǵannan keıin azamattarymyzǵa barlyq qajetti kómek kórsetiledi», - delingen resmı habarlamada.

Sondaı-aq, atalǵan vedomstvodan «Atameken» UKP-men birlesip, Ýkraına aýmaǵynda qalǵan qazaqstandyq aýyr júk kóligi júrgizýshileri týraly málimetter jınalyp, olardy alyp shyǵýdyń amaly qaralyp jatqandyǵy aıtyldy.