QR SІM otandyq kostıýmder tigetin kásiporyndardyń tizimin jasaýǵa kiristi

ASTANA. QazAqparat - QR Syrtqy ister mınıstrligi otandyq kostıýmderdi tigetin kásiporyndardyń tizimin jasaýǵa kiristi, dep habarlaıdy QazAqparat tilshisi.

Mınıstrliktiń resmı ókili Aıbek Smadııarovtyń aıtýynsha, atalǵan tizim boıynsha otandyq kıim-keshekti satyp alýǵa mindet qoıylmaıdy. Atalǵan qujattyń usynymdyq sıpaty bolady.

«Qazirgi kezde otandyq kostıýmderdi tigetin jáne satatyn kásiporyndaryń tizimin jasap jatyrmyz. Sony barlyq dıplomattarǵa taratamyz. Olar óz qalaýlary boıynsha sol jerge baryp, kıinetin bolady. Negizi, otandyq kostıýmderdiń sapasy sheteldik ónimderden esh kem emes. Máselen, men ózime jaqsy bir kostıýmdi tańdap aldym. Áıtpese, shetelden keletin ónimdediń baǵasy tym qymbat. Endi, tasymaldaý shyǵyndary bar, salyqtar, dúkenniń jalǵa alyp otyrǵan jeri jáne taǵysyn taǵy. Al ózimizde tigilgen kostıýmder áldeqaıda arzanǵa shyǵady», - dedi A.Smadııarov jýrnalısterge bergen suhbatynda.

Onyń aıtýynsha, otandyq kostıýmderdiń baǵasy 20-140 myń teńgeniń aınalasynda. «Mysaly, men óz kostıýmimdi 85 myń teńge satyp aldym. Kelesi joly mindetti túrde kıip kelemin. Qazirdiń ózinde kıip turǵan galstýgym - otandyq ónim. Budan bólek, ózimizde jaqsy aıaq kıimder de tigiledi. Almatyda, Shymkentte biraz jigitter osy kásippen aınalysady eken. Ózderi jasaıdy, ózderi satady», - dep atap kórsetti A.Smadııarov.

Eske salaıyq, Elbasy Nursultan Nazarbaev otandyq kásiporyndarǵa qoldaý kórsetý qajettigi týraly birneshe ret aıtqan bolatyn. Bul máseleni 2018 jyldyń qazanynda kezekti Joldaýyn jarııalaý kezinde de kóterdi.

«Mysaly, qazir osy jerde otyrǵandardyń ústindegi sheteldik kıimderdiń bárin alyp qoısa, tyr jalańash qalasyńdar. Bizde kóılekti de, kostıýmdi de shyǵara alady. Ondaı kásiporyndarǵa qoldaý jasaý qajet. Óz taýarymyzdy qoldaý kerek. Ózim talaı ret kórsettim ǵoı. Men tek otandyq kostıýmderdi kıip júremin. Sapasy sheteldik ónimnen esh kem emes. Al baǵasy on esege arzan. Sheteldik taýarlardy neǵurlym az tutynsaq, soǵurlym táýelsizdigimiz myqty bolady», - degen bolatyn Memleket basshysy.

Prezıdent bıyl 30 qańtarda ótken Úkimettiń keńeıtilgen quramdaǵy otyrysynda mınıstrler men ákimderdi otandyq kıim kııýge taǵy shaqyrdy.