QR SІM Ońtústik Koreıadaǵy qazaqstandyq azamattardy evakýatsııalaý qajettiligin joqqa shyǵarady

ASTANA. 9 sáýir. QazAqparat - QR SІM Ońtústik Koreıadaǵy qazaqstandyq azamattardy ázirge evakýatsııalaýdyń qajettiligi joq dep esepteıdi.

Bul týraly búgin ótken aptalyq brıfıngte QR SІM resmı ókili Janbolat Úsenov málim etti.

Onyń aıtýynsha, qazirgi kezde Ońtústik Koreıada shamamen 2,5 myń qazaqstandyq azamat bar. Olardyń 500-ge jýyǵy konsýldyq tizimge tirkelgender. Al Soltústik Koreıada bizdiń otandastarymyz joq.

«Biz Koreıa túbegindegi jaǵdaıdy jiti qadaǵalap otyrmyz. Ázirshe bizdiń mınıstrlik ol jaqtaǵy otandastarymyzdy evakýatsııalaýdyń qajettiligin kórip otyrǵan joq. Eger de mundaı qajettilik týyndaı qalsa, biz elimizdiń azamattaryn jedel túrde kóshirip alýǵa daıynbyz», - dep atap ótti J. Úsenov.