QR SІM Ońtústik Koreıada ustalǵan qazaqstandyqqa qatysty pikir bildirdi
ASTANA. QazAqparat - QR Syrtqy ister mınıstrliginde Ońtústik Koreıada aýyr qylmys jasady dep aıyptalǵan Qazaqstan azamaty Amanat Jumashtyń ustalýyna qatysty pikir bildirdi, dep habarlaıdy «QazAqparat» HAA tilshisi.
«Qazaqstannyń Ońtústik Koreıadaǵy elshiliginiń konsýldyq bólimi osy is jaıynda habardar. Tergeý amaldary júrip jatyr. Tergeý múddelerin saqtaý úshin Koreıa tarapy tergeýdiń jaıyn egjeı-tegjeıli aıtpaı otyr. Bizdiń konsýldyq prokýror jáne advokatpen baılanys ornatýǵa áreket etip jatyr», - dep málimdedi QR SІM baspasóz qyzmetindegiler «QazAqparat» HAA-ǵa.
Syrtqy saıası vedomstvodaǵylardyń aıtýynsha, Amanat Jumash zorlaý faktisimen aıyptalýda. «Bul másele Qazaqstannyń Koreıa Respýblıkasyndaǵy elshiliginiń konsýldyq bóliminiń erekshe baqylaýynda», - dedi baspasóz qyzmetindegiler.
Buryn Ońtústik Koreıa azamatshasy Shymkenttiń 23 jastaǵy turǵyny Amanat Jumashqa zorlady dep aıyp taqqanyn habarlaǵan bolatyn. Qazaqstandyqtyń ákesi Qaısar Sherimniń aıtýynsha, onyń uly aıypsyz, Ońtústik Koreıaǵa 2017 jyldyń aqpanynda obyrmen aýyrǵan anasyn emdetýge aqsha jınaý úshin jumys isteýge ketken.
Amanat Jumash túrli jumystardy istep júrgen. Amanattyń ustalǵany týraly týystary habarlaǵan. Olardyń aıtýynsha, sot 40 kúnnen soń ótedi. Amanat Jumashqa 5 jyldan 20 jylǵa deıin bas bostandyǵynan aıyrý jazasy berilýi múmkin.
