QR SІM-niń resmı ókili qazaqstandyqtardy Ýkraınadan evakýatsııalaý týraly pikir bildirdi
«Sońǵy birneshe kún boıy álemniń nazary Ýkraınada. Bizdiń Kıevtegi elshiliktiń qyzmetkerleri kúni-túni jumys isteýde. Qazaqstannyń azamattaryna kómek kórsetip qana qoımaı, ornalasqan elderindegi jaǵdaı jóninde ózekti aqparatty da jiberip turady.
Shuǵyl aqparat almasý, týyndaǵan máselelerdi jedel sheshý maqsatynda árıne belgili bir messendjerde jumys chatyn ashtyq. Sol chatta birge qýanyp, birge kúrsinip jatamyz. Ýkraınadaǵy áriptesterimizge suraqtardy jaýdyryp, sol turǵan jerinde jaýap ber dep jazatynymyz da bar.
Keshe ǵana BAQ-qa arnalǵan brıfıngte aıtyp ótkenimdeı, QR azamattary bar birneshe avtobýs shekaraǵa qaraı jolda kólik keptelisinde turdy. Olardyń jartysy shekaradan ótip, aman-esen Polshanyń aýmaǵynda azamattarymyzdyń ekinshi toby kelgenshe qonaq úıge ornalastyrdy.
Aıtaıyn degenim, birinshi toppen ilesip kele jatqan dıplomattardyń biri qyz bala. Jaǵdaı shıelenisken alǵashqy kúnnen bastap 24 saǵat uıqy men demalys bilmeı qyzmetin adal atqaryp keledi. Qashan telefonmen qońyraý shalmasań da, birden jaýap berip, tolyq ózekti aqparat beredi. Daýsynan baıqalyp turady qobaljyǵany, biraq bildirmeıdi.
Tek Polshaǵa kelgende kóńili bosap, kishkene emotsııaǵa berildi. Alaıda dıplomattarǵa ondaı minez belgisiz, sondyqtan jarty saǵattan keıin «keshirim suraımyn, qaıtadan qatardamyn, tapsyrma bar ma» dep chatqa jazdy.
Leıla hanym, qazaq dıplomatııasynyń betke ustar ókili dep tanımyn sizdi. Taǵy kishkene ýaqyttan keıin elde qaýyshamyz degen senimdemin. Qyz bala bolǵandyqtan repatrıatsııalyq reıspen elge qaıtaryp jatyrmyz.
Men biletin Leıla bolsa Qazaqstanǵa kelip demalyp jatpaı, Syrtqy ister mınıstrligine kelip, Ýkraınadaǵy jaǵdaıǵa baılanysty qurylǵan jumys tobynyń jumysyna kirisip ketetini anyq»,-dep jazdy resmı ókil.
