QR SІM Mysyrdaǵy terrorıstik áreketke baılanysty málimdeme jasady
ASTANA. QazAqparat - QR Syrtqy ister mınıstrligi Mysyrdaǵy terrorıstik áreketke baılanysty málimdemesi jasady, dep habarlaıdy atalmysh vedomostvonyń baspasóz qyzmeti.
«Qazaqstan 2017 jylǵy 24 qarashada Mysyrdyń Bır ál-Abd qalasynda ál-Raýda meshitindegi juma namaz kezinde oryn alǵan jáne esh kinásiz beıbit halyq arasynda kóptegen adamnyń ómirin qıǵan terrorıstik aktini qatań aıyptaıdy. Álem taǵy da terrorızm áreketine kýá boldy, onyń uıymdastyrýshylary men súıemeldeýshileri anyqtalyp, qatań jazalanýy tıis.
Mysyr úkimetine, qaza tapqandardyń otbasy men týystaryna shyn kóńilden shynaıy kóńil aıtamyz jáne jaraqat alǵandarǵa tezirek saýyǵyp ketýin tileımiz.
Qazaqstan terrorızmniń kezkelgen túri men sıpatyn aıyptaı otyryp, osy jaýyzdyq áreketke qarsy kúresý úshin BUU aıasynda Ǵalamdyq kontrterrorıstik koalıtsııa qurý arqyly álem qaýymdastyǵynyń ujymdasyp,batyl qımyldaýyn quptaıdy. Biz Halyqaralyq terrorızm jónindegi jalpyǵa ortaq konventsııany jedel túrde qabyldaýǵa shaqyramyz»,- delingen málimdemede.
