QR SІM mınıstrdiń Reseı men Ýkraınanyń Qazaqstanda kelissózder ótkizýi týraly sózin tolyq túsindirdi

NUR-SULTAN. QazAqparat – QR Syrtqy ister mınıstrliginiń resmı ókili Aıbek Smadııarov QR Syrtqy ister mınıstri Muhtar Tileýberdiniń Reseı men Ýkraınanyń Qazaqstanda kelissózder ótkizýi týraly sózderine qosymsha pikir bildirdi, dep habarlaıdy QazAqparat.

«Bul suraqty mınıstrge Jenevada ótip jatqan BUU Adam quqyqtary jónindegi keńesiniń otyrysy sheńberinde sheteldik aqparat agenttiginiń tilshisi qoıǵan edi. Onyń tolyq dáıeksózi kelesideı: «Árıne, adam shyǵyny úlken alańdaýshylyq týdyryp otyr. Orystar da, ýkraınder de biz úshin baýyrlas halyqtar ekeni túsinikti, sondyqtan biz árıne alańdaımyz. Óz tarapymyzdan araaǵaıyndyq qyzmetterdi paıdalaný úshin jan-jaqty kómek kórsetýge daıynbyz. Muny eki tarap ta qajet dep tapsa, biz kelissózder alańyn usynýǵa ázir».

Sonymen qatar, mınıstr bul másele boıynsha áli eshqandaı kelisim joq ekenin aıtty», - dedi Aıbek Smadııarov.