QR SІM Meksıkaǵa qazaqstandyqtardyń saparyn ýaqytsha toqtatýdy usyndy
NUR-SULTAN, QazAqparat - Qazirgi ýaqytta kóshi-qon daǵdarysyna baılanysty meksıkalyq bılik óz shekarasyn baqylaýdy kúsheıtýde. Bul týraly QR Syrtqy ister mınıstrliginde ótken baspasóz otyrysynda aıtyldy, dep habarlaıdy QazAqparat tilshisi.
«Sonyń saldarynan álemniń kóptegen memleketteriniń azamattary Meksıka aýmaǵyna jiberilmeı, keri deportatsııalanýda. Osyǵan baılanysty Meksıka shekarasynda qıyndyqtar týyndaýyn jáne josparlanǵan saparlardy shegerilýin boldyrmas úshin Meksıkaǵa týrıstik jáne iskerlik saparlardy ýaqytsha toqtatýdy usynamyz», - deıd QR SІM resmı ókili Aıbek Smadııarov.
Onyń aıtýynsha, Meksıkaǵa barý kerek bolǵan jaǵdaıda Meksıkanyń ýákiletti organdaryn aldyn ala jáne ýaqytyly habardar etý maqsatynda saıahatqa qatysty barlyq qosymsha aqparatty bere otyryp, Qazaqstannyń Meksıkadaǵy elshiligine eskertken jón.
«Sondaı-aq, kez kelgen eldiń memlekettik shekarasy arqyly ótý osy memlekettiń ishki saıasaty bolyp tabylady. Osyǵan baılanysty qazaqstandyq dıplomatııalyq ókildik tarapynan járdem kórsetý Meksıka aýmaǵyna erkin kirýge kepildik bermeıtinine nazar aýdaramyz», - deıdi ol.
Eske sala ketsek, buǵan deıin QR SІM-de ótken baspasóz otyrysynda QR Premer-mınıstri Asqar Mamın Nıderland koroldigine resmı saparmen baratyny týraly jazǵan bolatynbyz.
