QR SІM: Qytaıdyń eski zaýyttary Qazaqstanǵa ákelinedi degen aqparat – jaı ǵana qaýeset
«Qytaı bizde ınvestorlardyń tiziminde birinshi memleket emes. Ózderińiz biletindeı, eń birinshi oryndarda Nıderlandy (egemendik alǵaly beri 87 mlrd dollar ınvestıtsııa tartylǵan) tur. Ekinshi orynda AQSh (37 mlrd dollar), odan keıin Shveıtsarııa (23 mlrd dollar), Qytaı (17 mlrd dollar), Frantsııa (15 mlrd) ornalasqan. Qazaqstan men Qytaı Úkimetteri arasynda birlesken komıssııa bar. Sol komıssııa boıynsha yntymaqtastyq jóninde birikken baǵdarlamany qurǵanbyz. Osyndaı baǵdarlamany basqa eldermen de daıyndadyq. Búkil álemde saýda soǵysy júrip, sanktsııalar kóbeıip ketti. Mundaı jaǵdaıda ınvestorlar tynyshtyq izdeıdi. Olar árıne, qaýipti jerge baryp aqshasyn salmaıdy. Tıisti jaǵdaı uıymdastyratyn elderge baryp ınvestıtsııalaryn salady. Bizdiń aldymyzdaǵy maqsat – Qazaqstanda osyndaı jaǵdaı jasap, ınvestıtsııa tartý jumysyn ary qaraı jalǵastyrý», - dedi Ermek Kósherbaev OKQ-da ótken baspasóz máslıhatynda.
Sonymen birge Syrtqy ister vıtse-mınıstri «Qytaı elinen 55 eski zaýyt Qazaqstanǵa kóshiriledi-mys» degen áleýmettik jelilerde taraǵan áńgimege qatysty jaýap berdi.
«55 zaýyt degen baǵdarlama da joq. Kezinde estigenim: blogerlar nemese vatsaptaǵy rolıkterde 55 eski zaýyt degen áńgime bar eken. Resmı túrde aıtarymyz – ondaı baǵdarlama joq, eski zaýyttardy eshkim ákelmeıdi. Barlyq jobalardy ózimiz tańdap, tıisti memlekettik saraptamadan ótkizemiz. Ol jobalardy jekemenshik kásipkerler atqarady. Eski zattardy eshkim almaıdy. Bizdiń elge ákelmeıdi. Eger ondaı oı bolsa, bizdiń komıssııa árıne, oǵan tyıym salady. Tizimdegi 55 joba degen – ol zaýyttarǵa jatpaıdy. Jylyna eki ret qytaılarmen komıssııa otyrysyn ótkizemiz. Ár jobanyń tıisti jaǵdaıy, qandaı qıyndyqtary bar – talqylaımyz. Eski zaýyttar joq», - dedi Ermek Kósherbaev.
