16:07, 11 Maýsym 2018 | GMT +5
QR SІM: Qytaı azamattaryna vızasyz rejim engizý týraly aqparat - jalǵan
ASTANA. QazAqparat - QR Syrtqy ister mınıstrligi Qazaqstan men Qytaı arasynda vızasyz rejim engiziletinin joqqa shyǵardy, dep habarlaıdy QazAqparat.
«Qazaqstan Qytaımen vızasyz rejim engizý týraly kelissózder júrgizip jatqan joq. Messendjerler arqyly taratylǵan «Qytaı azamattary úshin vızalyq rejim joıylady» degen aqparat jalǵan, ári arandatýshylyq mándi bolyp tabylady. Qazaqstan tarapy Qytaıdyń halyqaralyq áýejaılary arqyly tranzıtpen ótetin Qazaqstan azamattary úshin vızasyz bolý merzimin 24 saǵattan 72 saǵatqa uzartý, sondaı-aq Qytaıǵa barýǵa nıetti qazaqstandyqtarǵa derbes vıza resimdeýdi qaıta bastaý boıynsha qytaı tarapymen belsendi jumys júrgizip otyrǵanyn esterińizge salamyz.
Osy baǵyttaǵy jumys eki el arasynda qalyptasqan jan-jaqty ózara áriptestik, taraptardyń múddelerine ózara qurmet negizinde jalǵasýda», - delingen QR SІM Feısbýktegi resmı paraqshasyndaǵy habarlamada.